ძალადობის მსხვერპლი, ავარიელი ტყვე ქალის გაშვილებული ბავშვები გამოჩნდნენ (ვიდეო)

თამუნა მუსერიძის, მის მიერ შექმნილი ჯგუფის "ვეძებ"  და ამავე სახელწოდების გადაცემის წყალობით, უკვე ყველასთვის კარგად არის ცნობილი შემზარავი დანაშაულის შესახებ, რომელსაც კონკრეტული დამნაშავე არ ჰყავს.

საუბარია ავარიელ ქალ აიშად ყურამაგამედოვაზე, რომელიც როგორც გადაცემის ავტორი გვიყვება, წლების წინ დაღესტნიდან გაიტაცეს და კახეთის ერთ-ერთ სოფელში ჩამოიყვანეს, სადაც მასზე წლების განმავლობაში ფიზიკურად და სექსუალურად ძალადობდნენ.

აიშადი სოფლის ერთი სახლის სარდაფში, არაადამიანურ პირობებში ჰყავდათ გამოკეტილი, სადაც სხვადასხვა ასაკის მამაკაცთან ურთიერთობა წლების მანძილზე, საკუთარი ნების წინააღმდეგ უწევდა.

გამუდმებულმა ძალადობამ მის ჯანმრთელობას წარუშლელი კვალი დაატყო: ქალს დამტვრეული აქვს კიდურები; დაზიანებული აქვს ხერხემალი, რის გამოც ვეღარ გადაადგილდება; თავზე მიყენებული ტრავმების გამო, დაკარგა მხედველობაც... 

ავარიელი ქალი, რომელსაც სმენის და მეტყველების პრობლემებიც აქვს, შეძლებისდაგვარად იხსენებს, რომ ტყვეობაში ცხრა ბავშვი გააჩინა, რომლებიც ზოგი გაუყიდეს და ზოგიც ისე გაუშვილეს. 

ამჟამად ის, ორ თანამემამულე ქალთან, უსაფრთხო გარემოში, მაგრამ ძალიან ხელმოკლედ ცხოვრობს.

თამუნა მუსერიძემ, გადამღებ ჯგუფთან ერთად თავიდან ჯერ ერთ, ხოლო შემდეგ, მეორე შვილს მიაკვლია, რომლებიც მეზობელ სოფელში აღმოჩნდნენ გაშვილებულები. მართალია, პირველმა შვილმა მოგვიანებით კამერებთან გამოჩენა გადაიფიქრა, ხოლო მეორე შვილმა სახელის და სახის გამოჩენა არ ისურვა, მაგრამ გადაცემის გამოსვლიდან სულ რაღაც ორ დღეში, აიშადის კიდევ რამდენიმე შვილი გამოჩნდა, ხოლო პირველმა ორმა ნაპოვნმა შვილმა, ერთმანეთის გაცნობის სურვილი უკვე გამოთქვეს.

"ამ გადაცემის მერე, აიშადის ორივე შვილი დაგვიკავშირდა. მათ, რა თქმა უნდა, ერთმანეთის გაცნობის სურვილი გამოთქვეს. აგრეთვე გავიგეთ სად არის კიდევ 4 ბავშვი. იმედია, მათაც მოუნდებათ და-ძმასთან და დედასთან ურთიერთობა. ძალიან დიდი მადლობა თითოეულ თქვენგანს გვერდში დგომისთვის და დახმარებისთვის.მე კი მოვკვდი ნერვიულობით და თქვენი არ ვიცი," - ემოციებს ვერ მალავს თამუნა მუსერიძე.

ნინა მამუკაძე

გადაცემის ბმული ნახეთ აქ:

https://fb.watch/9fMFACx8Ut/