გახარია 20 ივნისის მოვლენებზე: მშვენივრად ვმართავდი ყველაფერს

ბატონი ჭოლაძე ტყუის, როდესაც ამბობს, რომ იმ ოთახში, საიდანაც თქვენ მართავდით ამ ოპერაციას და ბრძანებებს გასცემდით და ინფორმაციებს იღებდით, იქვე დივანზე ჩამომჯდარი გყავდათ გერმანიის ელჩი, ტყუის?- ამ კითხვით მიმართა დროებითი საგამოძიებო კომისიის თავმჯდომარემ, თეა წულუკიანმა, „გახარია - საქართველოსთვის“ ლიდერს გიორგი გახარიას 2019 წლის 20 ივნისის მოვლენებთან დაკავშირებით.

გახარიამ უპასუხა, რომ მნიშვნელოვანი დავალებების გასაცემად გადიოდა სხვა ოთახში.

„არა, მაგ ოთახიდან მე არაფერს არ ვმართავდი. მე მაგ ოთახში ვიყავი ხოლმე, მაგრამ, როდესაც მნიშვნელოვანი დავალებები იყო გასაცემი, გავდიოდი, იქ იყო სხვა ოთახიც“, - განაცხადა გახარიამ.

თეა წულუკიანის დამაზუსტებელ შეკითხვაზე, იმ ოთახიდან იმიტომ ხომ არ გადიოდა, რომ იქ გერმანიის ელჩიც იყო, გახარიამ უპასუხა, რომ არა მარტო გერმანიის ელჩი, არამედ სხვა ბევრი ადამიანი იყო იქ.

„არა, იმიტომ, რომ იქ ბევრი სხვა ადამიანებიც იყვნენ, ელჩიც იქ იყო, ბევრი ადამიანი იყო, ხალხი მიდიოდა, მოდიოდა, ვიღაცა დეპუტატები შემოდიოდნენ, ვიღაცები გადიოდნენ, ბევრი იყო, მაგრამ იმ ოთახს ჰქონდა უკანა ოთახი, საიდანაც მშვენივრად ვმართავდი ყველაფერს. იმ ოთახში ბევრი ადამიანი იყო, იქიდან მნიშვნელოვანი დავალებების გაცემა, ინფორმაციის მიღება არ შეიძლებოდა“, - განაცხადა გახარიამ.

გახარიას პასუხს თეა წულუკიანის რეპლიკა მოჰყვა: „ისე მშვენივრად მართავდით იმ პატარა ოთახიდან, რომ თვალებიც დათხარეთ გოგოებს“.