გახარიას პარტიის წევრი გიორგი შარაშიძე: როგორღაც ტრამპი თავად დალაგდება იქაურ „დიფ სთეითთან“

 ვურჩევ „ოცნებას“, შეეშვან ამერიკის „დიფ სთეითთან“ ბრძოლას. პირველ რიგში, საკუთარ „დიფ სთეითს“ მიხედონ. როგორღაც ტრამპი თავად დალაგდება იქაურ „დიფ სთეითთან“ - განაცხადა „გახარია საქართველოსთვის“ წევრმა გიორგი შარაშიძემ.

შარაშიძის თქმით, თუ რომელიმე ქვეყანაშია „დიფ სთეითი“ დასამარცხებელი, ეს პირველ რიგში საქართველოა, რომელიც ჩრდილოვანი კაბინეტით იმართება.

„რამდენიმე თვის წინ „ოცნებამ“ აქტიური პროპაგანდა დაიწყო „დიფ სთეითის“ წინააღმდეგ და საქართველოს მოსახლეობას, პროპაგანდისტული მედია საშუალებების დახმარებით, აძლევდა იმედს, რომ დამარცხდებოდა „დიფ სთეითი“, ჩვენ მაშინაც ხუმრობით და იუმორით ვამბობდით, რომ შეიძლება გავიდეს გარკვეული პერიოდი და „ოცნებამ“ თავად აღიაროს, რომ თურმე ტრამპიც „დიფ სთეითი“ ყოფილა და ჩვენი ლიდერიც ამბობდა, ამაზე ალბათ ყველა ერთად ვიცინებთო. ვურჩევ „ოცნებას“, მოდი შეეშვან ამერიკის „დიფ სთეითთან“ ბრძოლას. პირველ რიგში, საკუთარ „დიფ სთეითს“ მიხედონ.

თუ „დიფ სთეითი“ არის რომელიმე ქვეყანაში, ეს პირველ რიგში, არის საქართველო, სადაც ოფიციალური პირები, მინისტრები, მთავრობის მაღალჩინოსნები არანაირ გადაწყვეტილებებს არ იღებენ და სწორედ ჩრდილოვანი კაბინეტი, რასაც რეალურად წარმოადგენს, „დიფ სთეითი“ მართავს ამ ქვეყანას, ამიტომ, თუ „დიფ სთეითი“ სადმე დასამარცხებელია, ეს პირველ რიგში, არის დასამარცხებელი საქართველოში ივანიშვილის მეთაურობით არსებული „დიფ სთეითი“, რომელიც ანგრევს ამ ქვეყნის დემოკრატიულ და ევროპულ მომავალს და ამიტომ, ჩვენ, ყველამ ყველაფერი უნდა გავაკეთოთ იმისთვის, რომ „დიფ სთეითი“ საქართველოში დავამარცხოთ. როგორღაც ტრამპი თავად დალაგდება იქაურ „დიფ სთეითთან“, -განაცხადა გიორგი შარაშიძემ.