გილოცავთ, მეგობრებო, ჩვენ სიკვდილზე გავიმარჯვეთ! - 4 წლის დამიანეს მამა ემოციურ პოსტს აქვეყნებს (ვიდეო)

„გილოცავთ, მეგობრებო, ჩვენ სიკვდილზე გავიმარჯვეთ!“, - წერს 4 წლის დამიანეს მამა.

პატარა დამიანე "ბურტიკის ლიმფომის" უმძიმეს ფორმას ებრძოდა. 

4 წლის დამიანე რამდენიმე თვიანი მკურნალობის შემდეგ, გერმანიიდან საქართველოში დღეს დაბრუნდება.

„მინდა ამ დიდ ბრძოლაში გამარჯვების შემდეგ ჩვენი საბოლოო ნაბიჯები გაგაცნოთ. მართალია ყველაზე დიდი, მთავარი და საერთო სიხარული უკვე გაგიზიარეთ, მაგრამ კიდევ არის დეტალები, რომლებიც გულს გაგიხარებთ და სულ მინიმუმ გაგაღიმებთ...

ჩემი, ჩვენი ბიჭი უკვე ისე ჯანმრთელია, რომ ნებისმიერი აქტივობისთვის არის მზად, შეუძლია ირბინოს, ივარჯიშოს, ბაღში იაროს, სრულფასოვნად, ძველებურად იცხოვროს, იხაროს და გვახაროს... 

მეგობრებო, მე არ ვიცი როგორ, რანაირად, რა ძალით შევძლებ იმის მეასედი მაინც გავაკეთო თქვენთვის, რაც თქვენ ჩემი შვილისთვის, ჩემი ოჯახისთვის, ჩემთვის, ნათისთვის, პატარა ნინუცასთვის გააკეთეთ, მაგრამ ის კი ნამდვილად უნდა იცოდეთ, რომ ჩემს მადლიერებას არ აქვს საზღვარი, არ აქვს საზღვარი სიხარულს, რომელიც ღვთის ნებით მოგვენიჭა და რაშიც წვლილი თითოეულ თქვენგანს მიუძღვის...

ჩემი არსებობის მიზანი ჩემი შვილების ღირსეულად აღზრდაა და ახლა ჩემი და ნათიას პასუხისმგებლობა გაათმაგდა, დამიანემ უნდა იცოდეს რამდენად დიდი ძალა აქვს მოყვასის სიყვარულს, რამდენად დიდი ძალა აქვს სიკეთის თესვას და სხვისი ჭირის გაზიარებას, რამდენად შეგვიძლია შევუმსუბუქოთ ტვირთი ერთმანეთს და რაც უფრო მეტნი ვიქნებით, მით მეტად გავუადვილებთ ერთმანეთს ამქვეყნიურ ყოფას...

ჩვენი შვილი თავად არის ჩვენი ერთიანობის, ჩვენი გამარჯვების საუკეთესო მაგალითი და პირობას გაძლევთ, ამ ისტორიით ის სხვებს გაუნათებს ცხოვრებას, გზებს...

მადლობა ღმერთს, რომ თქვენი წყალობით განგვიახლდა დამიანეს პირველად დაბადებით გამოწვეული სიხარული...

და ბოლოს, ხვალ, 20 დეკემბერს, გიბრუნდებით, ვუბრუნდებით ჩვენს ტკბილ ქვეყანას...გილოცავთ, მეგობრებო, ჩვენ სიკვდილზე გავიმარჯვეთ! სიყვარულით,დამიანეს მამა,“ - წერს დამიანეს მამა სოციალურ ქსელში.

დამიანეს დასახმარებლად არაერთი საქველმოქმედო კონცერტი და ღონისძიება გაიმართა.

ასევე საინტერესოა:

🔵 სახლში სერიოზული კონფლიქტი იყო - რას ჰყვება ზაზა ფაჩულია მშობლებზე? (ვიდეო)

🔵 ღამის კლუბები: მივმართავთ ყველა შესაძლო ზომას, რომ შევძლოთ კლუბების უსაფრთხო გახსნა და ჩვენი საყვარელი სივრცეების გადარჩენა

🔵 "20 დეკემბერს – ყველაზე გრძელი და ბნელი ღამე, აღარ გათენდა შენთვის" - ჟურნალისტი ნინო სამყურაშვილი გარდაცვლილ დედაზე