"გირჩი - მეტი თავისუფლებისთვის" აქცია სუსთან - ზურაბ ჯაფარიძეს ტერიტორია ევაკუატორის საშუალებით დაატოვებინეს

საქართველოს 6 ქალაქში, სახელმწიფო უსაფრთხოების სამსახურის შენობასთან "გირჩი - მეტი თავისუფლებისთვის" აქცია - პერფორმანსი მიმდინარეობს.

პარტიის ლიდერმა, ზურაბ ჯაფარიძემ თბილისში სუსის შესასვლელი ავტომანქანით ჩაკეტა, რომელშიც თავადვე იმყოფებოდა.

ადგილზე მობილიზებულმა სამართალდამცველებმა მას თავდაპირველად მოუწოდეს, რომ უწყების შესასვლელი გაეთავისუფლებინა, თუმცა უარის მიღების შემდეგ, ადგილზე ევაკუატორი მიიყვანეს და ჯაფარიძის ავტომობილი სხვა ტერიტორიაზე ევაკუატორის საშუალებით გადაიყვანეს.

დღეს, 12 საათიდან, "გირჩი - მეტი თავისუფლების" პოლიტიკოსებმა, საქართველოს 6 ქალაქში, სუსის შენობებთან, პროტესტის ნიშნად შესასვლელები მანქანებით ჩაკეტეს. 

პარტიის ინფორმაციით, დაკავებულია მათი ორგანიზაციის წევრები, მათ შორის ბათუმში დაკავებულია, გირჩის მერობის კანდიდატი გიორგი ფუტკარაძე. ასევე თელავში დააკავეს, მწერალი ტორესა მოსი. 

ზურაბ ჯაფარიძე და მისი თანაპარტიელები ითხოვენ, რომ პრეზიდენტი მიხეილ სააკაშვილი სამოქალაქო კლინიკაში გადაიყვანონ.

ამასთან "გირჩი - მეტი თავისუფლებისთვის" ითხოვს ჩატარდეს რიგგარეშე არჩევნები.

საქართველოს ექსპრეზიდენტი მიხეილ სააკაშვილი 1 ოქტომბერს დააკავეს და იგი დაკავების დღიდან შიმშილობს. ის ამჟამად იმყოფება სასჯელაღსრულების სისტემის მე-18 სამკურნალო დაწესებულებაში. 11 ნოემბერს მიხეილ სააკაშვილმა განაცხადა, რომ მაღალტექნოლოგიურ კლინიკაში, გარდა გორის სამხედრო ჰოსპიტლისა, გადაყვანის შემთხვევაში, მზად არის შიმშილობა შეწყვიტოს. გაერთიანებული ოპოზიცია კი 6 ნოემბრიდან პერმანენტულ აქციებს მართავს მიხეილ სააკაშვილის მაღალტექნოლოგიურ კლინიკაში გადაყვანის მოთხოვნით.

ასევე დაგაინტერესებთ:

🔲 "ვითხოვე მონახულების ნებართვა და ვიმედოვნებ, გადაწყვეტილება დადებითი იქნება" - ევროპარლამენტის პოლონელი დეპუტატი სააკაშვილის მონახულებაზე

🔲 "უკრაინის მოქალაქეების მიერ საქართველოს შიდა საქმეებში ჩარევა მიუღებელია" - ირაკლი ღარიბაშვილი