მაკა ბოჭორიშვილი: საქართველო შავი ზღვის ქვეყანაა, შავი ზღვა ჩვენი ისტორიის და მომავლის განუყოფელი ნაწილია

საბერძნეთის რესპუბლიკაში მიმდინარე „დელფოსის ეკონომიკური ფორუმის“ ფარგლებში, მაკა ბოჭორიშვილი სიტყვით გამოვიდა სამუშაო სესიაზე, რომელიც შავი ზღვის რეგიონულ და გლობალურ როლზე მსჯელობას დაეთმო, („ბრძოლა თავისუფალი და ღია შავი ზღვისთვის - რეგიონული და გლობალური გავლენა“), - ინფორმაციას საგარეო საქმეთა სამინისტრო ავრცელებს.

„სიტყვით გამოსვლისას, მინისტრმა ისაუბრა შავი ზღვის სტრატეგიულ მნიშვნელობაზე როგორც რეგიონული, ისე გლობალური უსაფრთხოებისა და ეკონომიკური სტაბილურობის კონტექსტში. მან განსაკუთრებული აქცენტი გააკეთა იმ ფაქტზე, რომ შავი ზღვა წარმოადგენს აღმოსავლეთისა და დასავლეთის დამაკავშირებელ სტრატეგიულ დერეფანს, რომელიც საუკუნეების განმავლობაში იყო ვაჭრობის, კულტურისა და დიპლომატიის გზაჯვარედინი.

მაკა ბოჭორიშვილმა ისაუბრა საქართველოს, როგორც შავიზღვისპირა ქვეყნის სატრანზიტო, ენერგეტიკული და სტრატეგიული პარტნიორის როლზე და დამსწრე საზოგადოებას წარუდგინა საქართველოს სტრატეგიული ხედვა, რომლის თანახმადაც სამომავლოდ შავი ზღვა თანამშრომლობის, განვითარებისა და მშვიდობის პლატფორმად უნდა იქცეს.

„საქართველო შავი ზღვის ქვეყანაა, შავი ზღვა ჩვენი ისტორიის და მომავლის განუყოფელი ნაწილია“, - განაცხადა მინისტრმა.

საგარეო უწყების ხელმძღვანელმა ხაზი გაუსვა საქართველოს მონაწილეობას რეგიონულ ინფრასტრუქტურულ და ენერგეტიკულ პროექტებში, რომლებიც ხელს უწყობს ევროპისა და აზიის ენერგეტიკულ და სავაჭრო ინტეგრაციასა და დაკავშირებადობას.

მაკა ბოჭორიშვილმა ისაუბრა შავი ზღვის რეგიონში არსებულ უსაფრთხოების გარემოზეც და ყურადღება გაამახვილა რეგიონში რუსეთის აგრესიულ ქმედებებზე.

მინისტრის განცხადებით, შავი ზღვის მომავალი უაღრესად მნიშვნელოვანია და მისი ღია, თავისუფალ, უსაფრთხო სივრცედ შენარჩუნება ერთობლივ მოქმედებას, სტრატეგიულ ხედვასა და მტკიცე პარტნიორობას საჭიროებს.

მაკა ბოჭორიშვილმა დაადასტურა საქართველოს მზადყოფნა ითანამშრომლოს ევროპელ და საერთაშორისო პარტნიორებთან შავი ზღვის რეგიონში მშვიდობისა და მდგრადობის უზრუნველსაყოფად.

დისკუსიაში ასევე მონაწილეობდნენ ეკონომიკისა და საგარეო პოლიტიკის კვლევების ცენტრის თავმჯდომარე ტაჯან ილდმემი და საერთაშორისო კონფერენცია „იალტის ევროპული სტრატეგიის“ აღმასრულებელი დირექტორი სვეტლანა კოვალჩუკი“, - აღნიშნულია გავრცელებულ ინფორმაციაში.