"მიწისძვრების მსხვერპლთა 83% ცხოვრობს კორუმპირებულ ქვეყანაში - საზოგადოებებს, სადაც მდიდრებს და ღარიბებს შორის დიდი სხვაობაა, არ აქვთ უნარი მშენებლობების წესების დადგენისა"

ჟურნალისტი თეონა გეგელია, სოციალურ ქსელში თურქეთ-სირიის მიწისძვრასთან დაკავშირებით პარალელებს ავლებს და საინტერესო ანალიზს აქვეყნებს:

"არ ვიცი აზრი აქვს თუ არა ამ ინფორმაციის გაზიარებას ქვეყანაში, სადაც 2013 წლის ივნისის ტრაგედიის შემდეგ, ხალხი ისევ ბედნიერად იშენებს ბინებს მდინარის კალაპოტში, მაგრამ იყოს მაინც ↓

2007 წელს მეცნიერებმა გამოაქვეყნეს კვლევა, რომელშიც გაანალიზებულია 1975 წლიდან 2003 წლამდე 42 ქვეყანაში მომხდარი 344 მიწისძვრის შედეგები. ამ კვლევამ აჩვენა, პირდაპირი კავშირი მსხვერპლის რაოდენობას და კორუფციას შორის: რაც უფრო მაღალია სახელმწიფოში კორუფციის დონე, მით მეტია მსხვერპლის რიცხვი. https://is.gd/Bp6Sx4

კიდევ ერთმა კვლევამ, რომელშიც ავტორებმა გააანალიზეს 1960 წლიდან 2002 წლამდე მომხდარი 269 დიდი მიწისძვრის შედეგები, აჩვენა პირდაპირი კავშირი დაღუპულების რაოდენობას და სოციალურ უთანასწორობას შორის. მეცნიერებმა ეს კავშირი იმით ახსნეს, რომ საზოგადოებებს, სადაც მდიდრებს და ღარიბებს შორის დიდი სხვაობაა, არ აქვთ უნარი მშენებლობების წესების დადგენისა და მათი კონტროლის, სეისმური საფრთხეების დონის მიხედვით ზონირების, ნაგებობების გამაგრების. https://is.gd/0d9sDj

ამ კვლევების შედეგები, 2011 წელს ჟურნალში Nature, მიწისძვრების ერთ-ერთმა ყველაზე ცნობილმა სპეციალისტმა ნიკოლას ამბრაზეუსმა შეაჯამა. ის ხმელთაშუა ზღვისპირეთის რეგიონის მიმართულებით მუშაობს. სტატიაში „კორუფცია კლავს“ მან გააანალიზა სხვადასხვა ქვეყნის მონაცემები მიწისძვრის მსხვერპლთა, მათი მშპ-სა (მთლიანი შიდა პროდუქტის) და კორუფციის აღქმის დონის კუთხით და აჩვენა, რომ ბოლო ოცდაათი წლის განმავლობაში ამ მიწისძვრების მსხვერპთა 83% ცხოვრობდა კორუმპირებულ ქვეყანაში, იქ სადაც კორუფციის დონე უფრო მაღალია, ვიდრე უნდა ყოფილიყო მათი მშპ-ს საფუძველზე.

ამბრაზეუსი წერს, რომ სამშენებლო სფერო, მსოფლიო ეკონომიკის ყველაზე კორუმპირებულ სეგმენტადაა აღიარებული... ტექნოლოგიების და მშენებლობების ნორმების არასკმარის დაცვას კი მიწისძვრები ყველაზე კარგად ავლენს. სტატიის ბმული https://www.nature.com/articles/469153a", - წერს გეგელია.

ასევე დაგაინტერესებთ:

* "არ მიიღოთ წამლები ექიმის დანიშნულების გარეშე! - გახსოვდეთ, ბებო მაროს და დეიდა იზოლდას წამალი თქვენ არ გამოგადგებათ ვინაიდან მათი დიაგნოზები, არ არის თქვენი დიაგნოზი!"

* თურქეთში მიწისძვრის შედეგად დაღუპულებს ნომრების მიხედვით კრძალავენ

* ვანდალური ფაქტის ჩამდენი 300 ლარით დაჯარიმდება - იმავე ქმედების განმეორება კი გამოიწვევს პატიმრობას 5 დღემდე