ნიკა გვარამიას ოცნება!

„მთავარი არხის“ დამფუძნებელი ნიკა გვარამია სოციალურ ქსელში ემოციურ სტატუს აქვეყნებს.

„დაბრუნება მინდა.

სადაც დედა, სკოლიდან მოსულს, ჩემი საყვარელი კარაქში, ნიორში, პილპილსა და ხახვში შემწვარი ხბოს დაბეგვილი ხორცის სუნს ატრიალებს, მაგრამ მშვიდად ჭამას არ მაცლის და სკოლის ამბების გამოკითხვით მტანჯავს.

სადაც მამა სამუშაოდან გვიან ბრუნდება, ბევრს ეწევა, დედას ეჯუჯღუნება, მაგრამ მაინც ყველაზე მშვიდი და გაწონასწორებულია სამყაროში. თავზე ხელს გადამისვამს პერიოდულად და დაიჩივლებს, რა სუ ჯუჯღუნებს ეს დედაშენიო.

სადაც ეზოში ლეღვის ფოთლების მომწარო, ლეღვის მერქნის მსუყე და ლეღვის ნაყოფის მოტკბო-მომჟავო სურნელია.

ოლეანდრების და გლიცინიების ქალაქში დაბრუნება მინდა. ზღვიდან წამოსული ბრიზი რომ მარილის და იოდის არომატს ამატებს და ამ ნაზავს მთელ ქალაქში ფანტავს. მთელი ქალაქის გავლით იქამდე მიერეკება, სანამ მთაზე შეფენილი კიპარისების და ციტრუსების ბაღების სუნს არ შეაჯახებს და ამ ქალაქის უნიკალურ არომატს არ "დასვამს". აი, იმას, სიზმარში რომ მცემს სრულიად ცხადად, სრულიად მკაფიოდ.

მე, ვინც ფერად სიზმრებსაც კი ვერ ვხედავ.

მე, ვინც არდადეგებიდან დაბრუნებისას, მანქანაში ჩაძინებული, ჩემს ქალაქს სუნით ვცნობდი და ეგრევე თავს წამოვყოფდი - "როგორც იქნა, სოხუმია".

მე, ვინც უკვე ძლივსღა ვიხსენებ ჩემს ქალაქს და ყველაზე ცხადად ეს სურნელი და მშობლების ხმა ჩამესმის ხოლმე.
მე, ვინც დაბრუნების გარდა, აღარაფერზე ვოცნებობ“, - წერს ნიკა გვარამია ფეისბუკის საკუთარ გვერდზე.

ასევე საინტერესოა:

🔵 არ ღირს ბავშვების ერთ მომენტში გახალისების მიზნით მათ მავნე ნივთიერებებით გაჯერებული ჰაერი ვასუნთქოთ - ინფექციონისტი საშიში პიროტექნიკის გამოყენებაზე წერს

🔵 საქართველოში თოვა და ძლიერი ქარია მოსალოდნელი

🔵 ლარი დოლართან მიმართებით გაუფასურდა, თურქულ ლირასთან მიმართებით კი გამყარდა - ვალუტის კურსი