ნიკოლოზ სამხარაძე: ნათლად ვხედავთ, რომ ევროკავშირში სულ უფრო და უფრო მეტი პოლიტიკოსი, თუ პოლიტიკური ჯგუფი ითხოვს გამჭვირვალობას, რაც ბოლო წლებში ნამდვილად გახდა პრობლემა

ნათლად ვხედავთ, რომ ევროკავშირში სულ უფრო და უფრო მეტი პოლიტიკოსი, თუ პოლიტიკური ჯგუფი ითხოვს გამჭვირვალობას, რაც ბოლო წლებში ნამდვილად გახდა პრობლემა, - განაცხადა პარლამენტის საგარეო საქმეთა კომიტეტის თავმჯდომარემ ნიკოლოზ სამხარაძემ გადაცემაში „იმედი LIVE“ ევროკომისიის პრეზიდენტ ურსულა ფონ დერ ლაიენის ირგვლივ განვითარებულ პროცესებზე.

„საკითხი, რის გამოც ურსულა ფონ დერ ლაიენს უნდობლობის პროცედურა მოუწყვეს, გამჭვირვალობას და ინფორმაციის დამალვას ეხება. ნათლად ვხედავთ, რომ ევროკავშირში სულ უფრო და უფრო მეტი პოლიტიკოსი, თუ პოლიტიკური ჯგუფი ითხოვს გამჭვირვალობას, რაც ბოლო წლებში ნამდვილად გახდა პრობლემა. შესაბამისად, უნდობლობის პროცედურაც სწორედ ამ ჭრილში უნდა დავინახოთ.

კარგია, რომ არასამთავრობოების დაფინანსებასთანაც ევროკავშირში სრულფასოვანი დისკუსია დაიწყო. იმედი მაქვს, რომ ეს კონკრეტულ შედეგებამდე მივა. არა მხოლოდ ჩვენთვის არის საინტერესო ვინ ხარჯავს ფულს საქართველოში, არამედ ევროპელი მოქალაქეებისთვისაც არის საინტერესო, რაში იხარჯება მათი ფული“, - აღნიშნა სამხარაძემ.

„ფაიზერგეითის“ სკანდალში გახვეულ ურსულა ფონ დერ ლაიენს ევროპარლამენტმა ნდობა გამოუცხადა. ფონ დერ ლაიენისთვის უნდობლობის ვოტუმის გამოცხადების ინიციატივა რუმინელ ევროდეპუტატ გეორგე პიპერის ეკუთვნოდა, რომელიც ჯგუფ „ევროპელი კონსერვატორები და რეფორმისტები“ წარმოადგენს - მასში მემარჯვენე პარტიები არიან გაერთიანებულები. თავად ჯგუფი პიპერის ინიციატივას გაემიჯნა.