ნინო წილოსანი: არსებობს კითხვა, თუ რის მიღწევა სურს დიდ ბრიტანეთს სანქციების დაწესებით და შემთხვევით, ხომ არ უკავშირდება ეს კონკრეტულ პოლიტიკურ მიზნებს?

„კითხვა არსებობს იმის თაობაზე, დიდ ბრიტანეთს სანქციების დაწესებით რა შედეგის მიღწევა სურს და შემთხვევით, ეს მიზნობრიობა ხომ არ უკავშირდება კონკრეტულ პოლიტიკურ მიზნებს?“ - აცხადებს პარლამენტის ვიცე-სპიკერი ნინო წილოსანი.

როგორც წილოსანმა ჟურნალისტებთან საუბრისას აღნიშნა, ძირითად შემთხვევაში, სანქციები კონკრეტული პოლიტიკური ზეწოლის და ზემოქმედების საშუალებად გამოიყენება და ამ შემთხვევაში, გაუგებარია, ვისზე ზემოქმედებისთვის არის აღნიშნული სანქციები მიმართული.

„პირობითად, გენერალურმა პროკურორმა უნდა გამოიძიოს, მათ შორის „ნაცების“ რეჟიმის დანაშაულები, ის უმნიშვნელოვანესი დარღვევები და დანაშაულები, რომლებიც სახელმწიფო გადატრიალებას უკავშირდება. თუ ეს სანქცია ამ ადამიანის და მასთან ერთად, სხვა სამართალდამცველების მუშაობის შეფერხებას ემსახურება, რა თქმა უნდა, საკმაოდ გაუგებარია თავად სანქციების მიზნობრიობა. ამ შემთხვევაში, კითხვას ვსვამთ, ჩვენს მეგობარ ქვეყანას, ამ სანქციების გამოშვებით, რა შედეგი სურს და შემთხვევით, ეს მიზნობრიობა ხომ არ უკავშირდება კონკრეტულ პოლიტიკურ მიზნებს?! – კითხვა იმიტომ არის რიტორიკული, რომ პასუხს თავად სანქციების დამწესებლისგან ითხოვს“, – განაცხადა წილოსანმა.