"ომიკრონი" 144 ადამიანს დაუდასტურდა, მათ შორის 105 საქართველოს მოქალაქეა, 39 უცხო ქვეყნის - ამირან გამყრელიძე

31 დეკემბრის მონაცემებით, საქართველოში ლაბორატორიულად „ომიკრონის“ 144 შემთხვევაა დადასტურებული.

ამის შესახებ ინფორმაციას დაავადებათა კონტროლისა  ეროვნული ცენტრი ავრცელებს. ცენტრის დირექტორის, ამირან გამყრელიძის განცხადებით,„ომიკრონის“ 144 დადასტურებული შემთხვევიდან 4 ინფიცირებულის ჰოსპიტალიზაცია გახდა საჭირო. მისი განმარტებით, ოთხივე მათგანს თანმხლები დაავადება აქვს და ჰოსპიტალიზაცია კოვიდის სიმძიმით არ იყო გამოწვეული.

„ყველა შემთხვევა მსუბუქი გახლავთ, აქედან 12 არის 18 წლამდე ბავშვი და მოზარდი. მთლიანად 144-დან მხოლოდ 4 იყო ჰოსპიტალიზებული, ისიც სხვა თანმხლები დაავადების გამო, მათი ჰოსპიტალიზაცია არ იყო გამოწვეული კოვიდის სიმძიმით. საშუალო ასაკი 144 ადამიანში სადღაც 37-38 წელია. 144-დან 105 არის საქართველოს მოქალაქე, 39 უცხო ქვეყნის. მათგან 70% არის სრულად ვაქცინირებული“, - აღნიშნა ამირან გამყრელიძემ.

ამირან გამყრელიძის განცხადებით, ქვეყანაში „ომიკრონის“​ ცირკულაცია თანდათანობით იმატებს და დადასტურებულ შემთხვევებზე დაახლოებით სამჯერ მეტია.

„144 არის ლაბორატორიულად დადასტურებული იმ საეჭვო შემთხვევათა რაოდენობიდან, რომელიც ჩვენთან იგზავნება. თუ 10 დღის წინ გამოგზავნილ შემთხვევებში ორში ან სამში დასტურდებოდა „ომიკრონი“, ახლა 30 გამოვლენილი შემთხვევიდან ნახევარზე მეტში დასტურდება. ეს ნიშნავს, რომ „ომიკრონის“​ ცირკულაცია ქვეყანაში თანდათანობით იმატებს. როდესაც ვსაუბრობთ 144 ლაბორატორიულად დადასტურებულ შემთხვევაზე, რეალურად შემთხვევები მეტია, რამეთუ რეალურად ხდება მხოლოდ PCR ნიმუშების კვლევა. სწრაფი ტესტით დადგენილ დადებით შემთხვევაში ლაბორატორიულად ეჭვს ვერ მივიტანთ. ამიტომ, ჩემი გადმოსახედიდან ცირკულაცია 144 შემთხვევაზე სამჯერ მეტია“, - აღნიშნა, ამირან გამყრელიძემ "ინტერპრესნიუსთან" საუბრისას.

ბოლო 24 საათში საქართველოში კორონავირუსის 796 ახალი შემთხვევა გამოვლინდა, გამოჯანმრთელდა 3 291 პაციენტი, 45 კი გარდაიცვალა.

ასევე დაგაინტერე­­­­სებთ:

🔵2022 წლის პირველი „კოვიდ-ამბები“ რა თქმა უნდა, კარგი ამბებით უნდა დავიწყო - გიორგი ფხაკაძე  

🔵მეუფე სტეფანე თავის კელიაში გონდაკარგული იპოვეს

🔵,,უფალმა შეუნდოს მათ, ვინც სხვა ეკლესიის ტერიტორიას ეპოტინება!" - ალექსანდრიის პატრიარქი