რატი იონათამიშვილი: ჩვენგან მადლობა ეკუთვნის ბატონ ირაკლი ღარიბაშვილს - მას საქართველოს პრემიერმინისტრობა მოუწია საკმაოდ რთულ და რისკებით სავსე პერიოდში და მთელი ამ ხნის განმავლობაში ჩვენმა ქვეყანამ იარა ამაყად და ღირსეულად

მას საქართველოს პრემიერმინისტრობა მოუწია საკმაოდ რთულ და რისკებით სავსე პერიოდში და მთელი ამ ხნის განმავლობაში ჩვენმა ქვეყანამ იარა ამაყად და ღირსეულად, - განაცხადა ადამიანის უფლებათა დაცვისა და სამოქალაქო ინტეგრაციის საპარლამენტო კომიტეტის თავმჯდომარემ რატი იონათამიშვილმა გადაცემაში „დღის ქრონიკა“ ირაკლი ღარიბაშვილის შესახებ, რომელმაც პოლიტიკიდან წასვლის შესახებ განცხადება დღეს გააკეთა.

იონათამიშვილმა გაიხსენა, რომ ღარიბაშვილს პრემიერობა გიორგი გახარიას გადადგომის შემდეგ მოუწია.

„ჩვენგან მადლობა ეკუთვნის ბატონ ირაკლი ღარიბაშვილს. აქცენტს მისი პრემიერობის მეორე ვადაზე გავაკეთებ. მას საქართველოს პრემიერმინისტრობა მოუწია საკმაოდ რთულ და რისკებით სავსე პერიოდში და მთელი ამ ხნის განმავლობაში ჩვენმა ქვეყანამ იარა ამაყად და ღირსეულად. ჩვენ შევინარჩუნეთ როგორც მშვიდობა, ასევე განვითარების ძალიან მნიშვნელოვანი ტემპები.

შეგახსენებთ, ის გახდა პრემიერ-მინისტრი, როდესაც გახარია „ნაცებისთვის“, მოღალატეობრივად გადადგა პრემიერ-მინისტრის პოსტიდან და ჩვენ უკვე ვიცით, ვისი დაკვეთით იყო ეს გადადგომა, რას ემსახურებოდა, რას ისახავდა ის მიზნად. ამ მძიმე ვითარებაში შემობრუნება მარტივი არ იყო. რა თქმა უნდა, ამ შემობრუნების უკან ბატონ ირაკლისთან ერთად მთლიანად „ქართული ოცნების“ გუნდი იყო, პირველ რიგში, პარტიის დამფუძნებელი და საპატიო თავმჯდომარე.

სწორედ ეს არის ის, რომ ძლიერი გუნდი ნიშნავს ძლიერ ქვეყანას და ძლიერ სახელმწიფოს. რა თქმა უნდა, ჩვენი ვალდებულება და პასუხისმგებლობაა რომ საქართველოს განვითარება და პროგნოზები ეკონომიკის თვალსაზრისით რაც კეთდება დღეს, მათ შორის ყველაზე ავტორიტეტული საერთაშორისო ინსტიტუტების მხრიდან, კიდევ უფრო გადაჭარბებით იყოს შესრულებული.

ბოლო თვეებში ჩვენ ვატყობთ, რომ ყოველ ჯერზე დაგეგმილზე უკეთესი შედეგები და პარამეტრები არის მაგიდაზე, რაც არის ფაქტები. ამიტომ დარწმუნებული ვარ, ირაკლი კობახიძის ხელმძღვანელობით კიდევ არაერთ მნიშვნელოვან პროექტს განვახორციელებთ, არაერთ მნიშვნელოვან საკითხს გადავჭრით და ჩვენი ქვეყნის შეუქცევად, სტაბილურ და მშვიდობიან განვითარებას უზრუნველვყოფთ“, - განაცხადა რატი იონათამიშვილმა.