"სტუმრის მოყვარული ქვეყანა დაემსგავსა ტომს, რომელიც უცხოს ქვაბში ჩასვამს, უღმერთოები" - გიორგი სუხიტაშვილი გორში ტურისტის მკვლელობას ეხმაურება

გორში, ბრიტანეთის მოქალაქე 28 წლის თომას კენედის მკვლელობის ფაქტს, მომღერალი გიორგი სუხიტაშვილი სოციალურ ქსელში ეხმიანება.

როგორც სუხიტაშვილი წერს, საქართველო „კანიბალების და უღმერთოების ქვეყანას“ დაემსგავსა.

„ჩემს სამშობლოში ჩემს საყვარელ გორში 28 წლის ბრიტანელი მუსიკოსი მოკლეს…

რას დავემსგავსეთ! საით მივდივართ?! ვიღაცები გამოვლენ და იტყვიან, შენ რა იცი იქ რა მოხდაო… სულ ასეა იქ რაღაც ხდება და მერე ვკლავთ!!!

ვიღაცისთვის, სულ რაღაცაა მიზეზი!

ერთი წამით შორიდან შეხედეთ ჩვენს „ღვთით კურთხეულ“, „ღვთისმშობლის წილხვედრ“, „მადლიან და კეთილ“ ქვეყანას.

იცით როგორს გვხედავენ?

ადრე, სასურველი, სტუმრის მოყვარული, ლაღი, ფერადი, საინტერესო და ღიმილიანი ქვეყანა დაემსგავსა ტომს რომელიც უცხოს ქვაბში ჩასვამს და მის გარშემო ჩვენს მრავალხმიან სიმღერებს და უნიკალურ ცეკვებს ვასრულებთ, ჰო, აი ასეთები ვჩანვართ კანიბალები და უღმერთოები!!!", – წერს გიორგი სუხიტაშვილი.

ბრიტანელი მუსიკოსი თომას კენედი, 28 წლის ახალგაზრდა ხელოვანი, რომელიც ერთ-ერთ მუსიკალურ კოლეჯში სწავლობდა, საქართველოში 30 აგვისტოს ტურისტად ჩამოვიდა. 7 ოქტომბერს, მკვლელობამდე რამდენიმე საათით ადრე, 28 წლის მამაკაცი გვირაბში ცოცხალი მუსიკის მოსასმენად გაჩერდა. ადგილობრივებმა სასმელზე დაპატიჟეს და მასაც უარი არ უთქვამს. თავადაც მუსიკოსმა მოგვიანებით, რამდენიმე პირთან ერთად, კაფეში გადაინაცვლა. რამდენიმე საათის შემდეგ კი მას სასტიკად გაუსწორდნენ, სცემეს და უგონო მდგომარეობაში მტკვარში გადააგდეს. საბოლოოდ ცხედარი მდინარე მტკვარმა 8 ოქტომბერს სოფელ ქვახვრელის მიმდებარე ტერიტორიაზე გამორიყა. შსს-მ მომხდარ ფაქტზე 5 პირი დააკავა, ისინი ამ დრომდე დუმილის უფლებას იყენებენ. ბრიტანელი ტურისტის მკვლელობის საქმეზე დაკავებულებს 13-დან 17 წლამდე პატიმრობა ემუქრებათ.