"წლის საუკეთესო სპექტაკლი" - ზურა პირველის კიდევ ერთი წარმატება პოლონეთში

პოლონეთში მოღვაწე ქართველი მსახიობი და რეჟისორი ზურა პირველი კიდევ ერთხელ მოექცა საზოგადოების ყურადღების ცენტრში. მის მიერ დადგმულო სპექტაკლი „ჩვენ, გრაფინიები, არ ვტირით“, ყოველწლიური თეატრალური პრიზის „ქარვის ბეჭედი 2020-2021”-ის გამარჯვებული გახდა, ნომინაციაში  „საუკეთესო სპექტაკლი”. „ExclusiveTV“ ზურა პირველს პოლონეთში დაუკავშირდა.

ზურა პირველი: „ეს არის ოლგა ადამსკას 85 წუთიანი თავისუფალი პროდუქცია, რამდენიმე თანამედროვე ავტორის ტექსტების კომპილაცია. სპექტაკლი არის დღეს ძალიან აქტუალურ თემაზე, ქალის და მამაკაცის უფლებებზე, ოღონდ არ იჭერს არც ერთ მხარეს, არც ქალისას და არც მამაკაცისას, პრივილეგიას არცერთს ანიჭებს, ხან ერთს ეშლება ხან მეორეს, მაგრამ მათი ერთმანეთის გარეშე არსებობა შეუძლებელია. სპექტაკლის არსიც სწორედ ეს არის და ალბათ ამიტომ დაიმსახურა მოწონება, მაგრამ, როგორც ცნობილია, მხოლოდ თემა ვერ მოიტანს სპექტაკლს წარმატებას - წარმატება მხოლოდ იდეის მაღალხარისხიან განხორციელებას მოაქვს.“

სპექტაკლის, რომლის პრემიერაც 2020 წლის 11 სექტემბერს შედგა, დამდგმელი რეჟისორი ზურა პირველია, მთავარ როლს პოლონელი ვარსკვლავი ოლგა ადამსკა ასრულებს, ხოლო მისი პარტნიორი რომან რიდზია. 2021 წელს „ჩვენ, გრაფინიები, არ ვტირით“, „ტეატრ პოლსკი”-მ შეისყიდა და დღეს სპექტაკლი მისი კუთვნილებაა.

ნინა მამუკაძე