ცნობილი ქართველი მეცნიერი და საზოგადო მოღვაწე მადონა მეგრელიშვილი გარდაიცვალა

გარდაიცვალა აკაკი წერეთლის სახელმწიფო უნივერსიტეტის პროფესორი, ცნობილი ქართველი მეცნიერი და საზოგადო მოღვაწე მადონა მეგრელიშვილი - ამის შესახებ ინფორმაციას აკაკი წერეთლის სახელმწიფო უნივერსიტეტი ავრცელებს. 

"უდიდესია ქალბატონი მადონას ღვაწლი აკაკი წერეთლის სახელმწიფო უნივერსიტეტის წინაშე. იგი სხვადასხვა პერიოდში იყო ქუთაისის სახელმწიფო პედაგოგიური ინსტიტუტის ფილოლოგიის ფაკულტეტის დეკანი, დასავლეთ ევროპული ენების კათედრის ხელმძღვანელი. ქალბატონი მადონა მეგრელიშვილი მრავალი წლის მანძილზე დიდი ენთუზიაზმით უძღვებოდა ქუთაისის აკაკი წერეთლის სახელობის სახელმწიფო უნივერსიტეტის ინგლისური ფილოლოგიის კათედრას. მისი უდიდესი ძალისხმევის შედეგად კათედრამ შთამბეჭდავ შედეგებს და საერთაშორისო აღიარებას მიაღწია, რასაც ადასტურებს კურსდამთავრებულთა მრავალი თაობის წარმატებული პროფესიული კარიერა.

პროფესორ მადონა მეგრელიშვილს ქვეყნის წამყვან ლინგვისტთა შორის საპატიო ადგილი ეჭირა. მას საქართველოსა და უცხოეთში გამოქვეყნებული აქვს მრავალი შრომა მათ შორის მონოგრაფიები, სახელმძღვანელოები და ლექსიკონი. მისი, როგორც მეცნიერხელმძღვანელის დამსახურებაზე მეტყველებს ათობით წარმატებით დაცული დისერტაცია.

მისმა მოღვაწეობამ დიდი კვალი დატოვა არა მარტო უნივერსიტეტის, არამედ ქალაქისა და ქვეყნის ცხოვრებაზე. მისი უშუალო ხელმძღვანელობითა და ხელშეწყობით დაფუძნდა ქუთაისი-ნიუპორტის საერთაშორისო ასოციაცია, დამყარდა როგორც კულტურულ-საგანმანათლებლო, ისე ეკონომიკური კავშირები ამ ორ ქალაქს შორის, რამაც ეს ურთიერთობა მსოფლიოს ყველა სხვა მეგობარი ქალაქებისათვის მოდელად აქცია.

პროფესორი მადონა მეგრელიშვილის ღვაწლის ერთ-ერთი ბოლო აღიარება იყო საქართველოს მეცნიერებათა ეროვნული აკადემიის საპატიო სიგელი, რომელიც მას ფილოლოგიის დარგში განსაკუთრებული დამსახურებისთვის მიენიჭა.

აკაკი წერეთლის სახელმწიფო უნივერსიტეტი ღრმა მწუხარებას გამოთქვამს პროფესორ მადონა მეგრელიშვილის გარდაცვალების გამო და უსამძიმრებს მის ოჯახს, ახლობლებს, კოლეგებს, სტუდენტებს, ქუთაისსა და მთელ საქართველოს", - აღნიშნულია უნივერსიტეტის მიერ გავრცელებულ ინფორმაციაში