„ყოველი წლის საპატიო და ყველასათვის საყვარელი მოქალაქე გიორგი (გიგა) ბათიაშვილი გარდაიცვალა“ - დავით გადელია

ბოჭორიშვილის სახელობის კლინიკის ხელმძღვანელი, დავით გადელია სოციალურ ქსელში სამწუხარო ინფორმაციას ავრცელებს და წერს, რომ გარდაიცვალა არქიტექტორი გიორგი (გიგა) ბათიაშვილი.

„ჩემს თავზე ვიტყვი, სხვას რომ არ ეწყინოს; ძალიან მიყვარს ჩემი ქალაქი და ვაკეთებ იმას, რაც შემიძლია. ბოლო დროს, გარემოების გამო, ცოტა მეტად დავჭირდით ქალაქს და მოქალაქეებს და ქალაქმაც ჩვენი ყოველდღიური, ნამცეცა შრომა ასმაგად დაინახა, ასმაგად დააფასა და შარშან ჩემთვის უხერხულობამდე დიდი - თბილისის საპატიო მოქალაქეობა მომანიჭა.

უღრმესი მადლობა ცხადია, მაგრამ მაინც ეს დაფასება მსოფლიოში მიმდინარე ამ მოვლენების, დროებითი ჭირის გამოძახილი და პასუხია.

ამ დილით გარდაიცვალა ადამიანი, რომლის ყოველდღიური მოღვაწეობა იყო ქალაქზე ზრუნვა, თავისი საყვარელი ქალაქის (და არა ცალკე კორპუსების) შენება, ათეული წლების განმავლობაში! მართლაც, ყოველი წლის საპატიო და ყველასათვის საყვარელი მოქალაქე გიორგი (გიგა) ბათიაშვილი!

ძალიან ვწუხვარ. თითქოს გუშინაც კი იმედიანად ვიყავით, მაგრამ ავმა სენმა სასიცოცხლო ძალები გამოულია..

დღეს თბილისი, ერთი ძალიან დიდი მოქალაქის, დიდი მოამაგის გარეშე დარჩა..“,

- წერს ფეისბუკის საკუთარ გვერდზე დავით გადელია.

ცნობისთვის, არქიტექტორ გიორგი (გიგა) ბათიაშვილის ძირითადი ნამუშევრებია: თბილისის მეტროპოლიტენის სადგური "300 არაგველი". თბილისის ფუნიკულიორის ქვედა სადგური.

იტალიელთა წინააღმდეგობის მოძრაობის გმირთა მემორიალი პერეზაში (ქ. არონის მახლობლად, იტალია, 1972; მოქანდაკე თეიმურაზ გიგაური).

თბილისის ისტორიული უბნების — შარდენის ქუჩის, ბამბის და რკინის რიგების, კონსტანტინე ლესელიძისა და დუტუ მეგრელის ქუჩების, ღვინის აღმართის, ქარვასლის, სიონის ტაძრის მიმდებარე ტერიტორია და ორბელიანთ უბნის განაშენიანების რეკონსტრუქცია-რეგენერაცია, ასევე ძველი თბილისის ცალკეული შენობები.

ბათიაშვილი ავტორია „მეიდნის“, ქეთევან წამებულის პროსპექტისა და ბარათაშვილის აღმართის მიმდებარე ტერიტორიის.

ასევე საინტერესოა:

🔵 შეუძლებელია, ქართულ ოცნებას ეს გაუვიდეს - გიორგი გახარია

🔵 ჩემზე არ ინერვიულოთ! - მიხეილ სააკაშვილი