"გახსოვთ ვერეს ტრაგედია? გზა არავის გაუუქმებია... 7 წელი გავიდა" - ბუბა კუდავა

გამომცემლობა "არტანუჯის" დამფუძნებელი ბუბა კუდავა გუდაურში მომხდარ ტრაგედიას ეხმაურება და წერს:

"გახსოვთ ვერეს ტრაგედია?

სამაშველო ვერტმფრენები ახალი გაყიდული ჰქონდათ, მაგრამ შეძლეს და საზოგადო ბრაზს ოსტატურად სხვა მიმართულება მისცეს:

მაგ ხეობაში გზის გაყვანა როგორ შეიძლებოდაო!

ატყდა ვაი-ვიში და წყევლა-კრულვა.

გავიდა 7 წელი!

გზა არავის გაუუქმებია.

ხეობაში მიმდინარე მშენებლობები არ შეწყვეტილა.

პირიქით, დასრულდა და უზარმაზარი ახალი კორპუსებიც წამოიმართა.

ზოოპარკიც ადგილზეა.

სამაშველო ვერტმფრენებიც არ უყიდიათ.

კიდევ ბევრი სხვა რამ არ უქნიათ.

მორიგი ტრაგედია.

ისევ სხვაგან უშვებენ ბრაზს:

პარაპლანისტებიო, უკონტროლობაო, რეგულაციებიო არააო, ექსტრემიო, აკრძალვაო...

აიკრძალოს-აიკრძალოს-აიკრძალოს კი არა, იაზროვნე-იაზროვნე-იაზროვნე.

ოდესმე სწორი მიმართულებით გაბრაზებას თუ ვისწავლით ნეტავ",- წერს კუდავა.

2015 წლის 13 ივნისის ტრაგედიიდან, 7 წელი გავიდა. მდინარე ვერეს ხეობაში მომხდარმა სტიქიამ 22 ადამიანის სიცოცხლე შეიწირა, ორი დაკარგულია.

სტიქიური უბედურება გვიან ღამით დაიწყო - მთლიანად დაიტბორა სვანიძის ქუჩა, სანახევროდ დაინგრა ვაკე-საბურთალოს დამაკავშირებელი ესტაკადა, წყალმა დაფარა გმირთა მოედანი და ”მზიურის“ პარკი.

წყალდიდობის შედეგად თითქმის მთლიანად განადგურდა თბილისის ზოოპარკი.

უსახლკაროდ რამდენიმე ათეული ოჯახი დარჩა.

მდინარე ვერეს ადიდება ბეთანიის გზაზე წარმოქმნილმა მძლავრმა მეწყერმა გამოიწვია.

ასევე დაგაინტერესებთ:

* "ვარდნის მომენტში ვერტმფრენიდან პარაშუტით გადმოხტომა ვერ მოესწრებოდა? - რომ არსებობდეს დაცვის ეს ზომა ძალიან ძვირი ეღირება?"