"საპარლამენტო ტრიო კვარტეტად გადაიქცა, როგორც ჩანს არჩევნებისთვის ივანიშვილი ორ პარტიას ქმნის" - რომან გოცირიძე "ქართული ოცნებიდან" კიდევ ერთი დეპუტატის გასვლას ეხმიანება

ოპოზიციონერი დეპუტატი, რომან გოცირიძე, "ქართული ოცნებიდან" კიდევ ერთი დეპუტატის გასვლას ეხმიანება და წერს:

"საპარლამენტო ტრიო კვარტეტად გადაიქცა. ეს მხოლოდ დასაწყისია.

როგორც ჩანს, მომავალი არჩევნებისთვის ივანიშვილი ორ პარტიას ქმნის, რომელთაც პირობითად შეიძლება “ქორქოცები” და “ბატქოცები” ვუწოდოთ.

ქორები საპარლამენტო ალტ-ინფოდ მოიაზრებიან, რომლებიც იქნებიან ღიად პრორუსულები და ღიად ანტიდასავლურები, ბატები კი კვლავ მრავალ ხმაზე იყიყინებენ.

დირიჟორი კვლავ კულისებიდან შეეცდება მართვას.

არ გამოუვა ძველებურად კომფორტულად ცხოვრება.

ან უნდა დაბრუნდეს პოლიტიკაში, რაც გარდაუვალი კრახია, ან უნდა დარჩეს ისეთ მდგომარეობაში, როგორშიც იმყოფება, რაც ასევე კრახია.

პროცესი, რაც წამოიწყო, არის არასერიოზული.

ყოველი შემდგომი ნაბიჯი იმაზე მეტი შეცდომაა, რაც წინა.

რაც უფრო უახლოვდება სანქციები და ხელისუფლების დაკარგვის საფრთხე, უფრო მეტ შეცდომას უშვებს.

ახლა მთავარია ეს “ტრიუკები” მის პირად პრობლემად იქცეს და არა ქვეყნის პრობლემად", - წერს გოცირიძე.

საპარლამენტო უმრავლესობის წევრმა გურამ მაჭარაშვილმა პარტია „ქართულ ოცნებას" დატოვა და დამოუკიდებელი დეპუტატის მანდატით განაგრძობს პარლამენტში საქმიანობას.

როგორც მან თავად განმარტა, გუნდს ტოვებს იმისთვის, რომ მეტი ინფორმაცია მიაწოდოს საზოგადოებას მსგავსად იმ დეპუტატებისა, რომლებმაც ეს უკვე გააკეთეს. 

ამავე თემაზე:

*  "ქართულ ოცნებიდან" წასულ სამეულს გურამ მაჭარაშვილიც უერთდება