გივი მაჭარაშვილი ზედიზედ მეორედ ევროპის ჩემპიონია!

რუმინეთის დედაქალაქ ბუქარესტში მიმდინარე ევროპის ჩემპიონატზე თავისუფალ ჭიდაობაში ჩინებული სტარტი აიღო საქართველოს ნაკრებმა. პირველ სამედლო დღეს ხუთივე ქართველმა საპრიზო ადგილებისთვის იჭიდავა. 

ჩემპიონი გახდა გივი მაჭარაშვილი(97კგ), რომელმაც კონტინენტის პირველობა ზედიზედ მეორედ მოიგო. მაჭარაშვილმა ტურნირი მშვენიერი მოგებით დაიწყო - ლიეტუველ ლუკას კრასაუსკასს 13:2 სძლია, ნეიტრალური გუნდის ბელარუს ალექსანდრ ჰუშტინს 4:1, ნახევარფინალში კი 7:2 სძლია იმ თურქ იბრაჰიმ ჩიფჩის, ვისაც შარშანდელ ევროპირველობაზეც მოუგო. ფინალში კი აზერბაიჯანის სახელით მოასპარეზე მაგომედხან მაგომედოვი 7:1 დაამარცხა. 

ფინალში იჭიდავა აკაკი ქემერტელიძემ(70კგ), სომეხ არმენ ანდრეასიანთან დამარცხდა და ვერცხლის მედალს დასჯერდა. ფინალამდე ქემერტელიძემაც წმინდად მოიგო ევროპირველობაზე თავისი სადებიუტო პაექრობა - 11:0 სძლია "ნეიტრალთა" ბელარუს ვლადისლავ კოიკას. თურქ ჰეიდარ იავუზს 7:4, ნახევარფინალში კი ბულგარელთა შარშანდელ ევროპის ფინალისტსა და მსოფლიოს მესამე პრიზიორ რამაზან რამაზანოვს 5:2 აჯობა. 

ბრინჯაოს მედლებს დაეუფლნენ რობერტ დინგაშვილი(57კგ) და ავთანდილ კენჭაძე(79კგ), ხოლო გოდერძი ძებისაშვილმა65კგ) დათმო მესამე ადგილისთვის შეხვედრა. 

ხვალ, ფინალში იასპარეზებს მსოფლიოს 3-გზის ჩემპიონი გენო პეტრიაშვილი(125კგ) და მუდმივ მეტოქეს, თურქ ტაჰა აკგულს დაეჭიდება, ხოლო შოთა ფარტენაძე(61კგ), გიორგი გოგრიჭიანი(74კგ) და მირიან მაისურაძე(92კგ) ბრინჯაოს მედლებისთვის იბრძოლებენ.