ნეაპოლი ჩემპიონობისთვის მზადაა

იტალიის სერია A-ს 32-ე ტურის კალენდარში ცვლილება შევიდა და "ნაპოლის" მატჩი "სალერნიტანას" წინააღმდეგ კვირას, 30 აპრილს, თბილისის დროით 17:00 საათზე გაიმართება.

ამ დროისთვის "ინტერისა" და "ლაციოს" დაპირისპირება უკვე დასრულებული იქნება და ნეაპოლელებს ეცოდინებათ, "სალერნიტანასთან" გამარჯვება ჩემპიონობისთვის საკმარისი იქნება თუ არა.

ნეაპოლი სრულ მზადყოფნაშია და 33-წლიანი პაუზის შემდეგ კიდევ ერთ, რიგით მესამე ჩემპიონობას იზეიმებს. იმ შემთხვევაში თუ "ლაციო" "ინტერთან" დამარცხდა,  "სალერნიტანასთან" მატჩი ერთგვარი ფინალის ტოლფასი იქნება და გამარჯვების შემთხვევაში ნეაპოლის ქუჩებს ზეიმის დიდი ტალღა დაფარავს.

"ნაპოლისა" და "სალერნიტანას"  პირველი მატჩში, რომელიც იანვარში შედგა,  ნეაპოლელებმა დი ლორენცოსა და ოსიმენის გოლებით 2:0 გაიმარჯვეს. მას შემდეგ, "სალერნიტანამ" აუტსაიდერობას თავი დააღწია და ბოლო 8 თამაშში 2 მოიგო და 6 ფრედ დაასრულა.

მატჩის, რომელსაც მარჩენარო განსჯის, მნიშვნელობიდან გამომდინარე, სპალეტი ექსპერიმენტებს მოერიდება და კვლავ ოპტიმალურ შემადგენლობას გამოიყვანს "დიეგო მარადონაზე" (პოლიტანო, მარიო რუი და სიმეონე გუნდს ტრავმის გამო ვერ დაეხმარებიან). სავარაუდო შემადგენლობა: მერეტი - დი ლორენცო (კაპ), რაჰმანი, კიმი, ოლივერა - ლობოტკა, ანგისა, ზელინსკი - ლოსანო, ოსიმენი, კვარაცხელია.