“ქართული ტალანტი”, “ჯადოქარი”, “კვარდონა”, “ფენომენი” - ხვიჩა კვარაცხელია იტალიური მთავარი სპორტული გამოცემის პირველ გვერდზე

“ქართული ტალანტი”, "ვარსკვლავბიჭუნა",“ჯადოქარი”, "კვარადონა", “ფენომენი”- ასეთი  შეფასებები იწერებოდა სოციალურ ქსელებში ხვიჩა კვარაცხელიას შესახებ, ორ მატჩში სამი საოცარი გოლის გატანის შემდეგ.

ქართული და ახლა უკვე იტალიური ფეხბურთის სიამაყე, დღეს იტალიური მთავარი სპორტული გამოცემის Corriere dello sport-ის პირველ გვერდზეა სათაურით - "კვარასტელა" (კვარავარსკვლავი), ნაპოლის ახალი სინათლე".

გუშინ, დიეგო არმანდო მარადონას სახელობის სტადიონის ტრიბუნები, ხვიჩას გვარს უკვე უშეცდომოდ სკანდირებდნენ. ქალაქში, სადაც ფეხბურთი რელიგიასთან არის გათანაბრებული, ფეხბურთის ახალი ვარსკვლავი დაიბადა და ის ქართველია. 

ხვიჩა კვარაცხელიას თამაშის ტექნიკურ-ტაქტიკურ მხარეებზე სპორტული ჟურნალისტები უკეთ გიამბობენ, მე კი, როგორც ემიგრანტი ჟურნალისტი, თავს უფლებას მივცემ ის დავწერო რასაც ვგრძნობ, რადგან მხოლოდ ჩემთვის, ვერ ვიტევ ამ ზღვა ემოციას. 

დავჯექი სტატიის დასაწერად, გავხსენი ვორდის ფაილი და გადავხედე გუშინდელ იტალიურ სპორტულ ახალ ამბებს, რომ თქვენთვის დეტალები მომეყოლა, მაგრამ გუშინდელივით, ისევ ტირილი დავიწყე. 10 წლიანი ემიგრაციის ფონზე, შენი ქართველის ამხელა წარმატება და ათასობით იტალიელის ხმის ჩახლეჩამდე ქართული გვარის და საქართველოს ყვირილი, ყოვლისმომცველი აღმოჩნდა. დეტალებზე შემდეგ სტატიაში მოგიყვებით, ახლა კი უბრალოდ მინდა ვთქვა 

გ მ ა დ ლ ო ბ,   ხ ვ ი ჩ ა!

ნინა მამუკაძე სპეციალურად ფლორენციიდან.