ქართველი მსაჯები რაგბის ჩემპიონთა თასზე, ფრანგული "კასტრისა" და ინგლისური "ჰარლექუინსის" შეხვედრაზე იმსაჯებენ

რაგბის ერთ-ერთ ყველაზე პრესტიჟულ საკლუბო ტურნირზე, ჩემპიონთა თასზე ქართველი არბიტრები ნიკა ამაშუკელი, შოთა თევზაძე და საბა აბულაშვილი იმსაჯებენ.

ინფორმაციას საქართველოს რაგბის კავშირი ავრცელებს.

ქართული მსაჯთა ბრიგადა 12 დეკემბერს 2021-2022 წლების გათამაშების პირველ ტურში ფრანგული „კასტრისა" და ინგლისური „ჰარლექუინსის" შეხვედრას გაუძღვება.

მოედნის მსაჯი ნიკა ამაშუკელი იქნება, თევზაძე და აბულაშვილი კი მას გვერდითი ხაზიდან დაეხმარებიან.

ნიკა ამაშუკელის განცხადებით,ეს მათთვის დიდი გამოცდა იქნება.
 
„გარდა იმისა, რომ ფრანგულ-ინგლისური დაპირისპირება ყოველთვის პრინციპულია, „ჰარლექუინსი" ინგლისის მოქმედი ჩემპიონია, „კასტრი" კი განსაკუთრებით საკუთარ მოედანზე წაგებას არავისთან კადრულობს. ასეთ მტკივნეულ ჯახებზე მსაჯებს მაშინ ნიშნავენ, როდესაც აინტერესებთ, როგორ იმოქმედებენ ისინი მაღალი წნეხის პირობებში. ეს მსოფლიო რაგბის მხრიდან ერთგვარი აღიარებაა", - განაცხადა ამაშუკელმა.
 

რაგბის კავშირის ცნობით, ნიკა ამაშუკელს საკმაოდ დატვირთული შემოდგომა ჰქონდა. ის მთავარი მსაჯი იყო ირლანდია-იაპონიასა და ფრანგი ბარბაროსები-ტონგაზე, ხოლო უელსი-ავსტრალიას კიდის არბიტრის რანგში მოემსახურა.

აღსანიშნავია, რომ ამაშუკელმა სამივე თამაშის შემდეგ კარგი შეფასება მიიღო.

ჩემპიონთა თასი 1995 წელს ჰეინეკენის თასის სახელით დაარსდა და მასში ინგლისის, საფრანგეთის, ირლანდიის, უელსის, შოტლანდიისა და იტალიის წამყვანი კლუბები მონაწილეობენ.

2014 წლიდან მას ჩემპიონთა თასი ეწოდება და აქამდე არასდროს ყოფილა შემთხვევა, რომ მისი ეგიდით ჩატარებული მატჩი ტიერ 2 ქვეყნის წარმომადგენელს ემსაჯოს.

ასევე დაგაინტერესებთ: 

🔲 საქართველოს რაგბის კავშირი 60 წლისაა - როგორ აღნიშნეს საიუბილეო თარიღი (ფოტოკოლაჟი)