2024 წელს მოვალეობის შესრულებისას მსოფლიოში 54 ჟურნალისტი დაიღუპა

2024 წელს მსოფლიოში საკუთარი მოვალეობის შესრულებისას 54 ჟურნალისტი დაიღუპა. განსაკუთრებით მაღალი რისკის ქვეშ იყვნენ ჟურნალისტები, რომლებიც სამხედრო კონფლიქტებს აშუქებდნენ. ინფორმაციას Deutche Welle ავრცელებს.

კრიზისულ რეგიონებში ბოლო 5 წლის განმავლობაში ყველაზე მეტი ჟურნალისტი წელს დაიღუპა. ყველაზე საშიში რეგიონი ამ მხრივ ღაზას სექტორი იყო. კვლევა ორგანიზაციის, „რეპორტიორები საზღვრებს მიღმა“ შეფასების საფუძველზე იყო შედგენილი.

ამჟამად მსოფლიოში პატიმრობაში 550 ჟურნალისტი იმყოფება, რაც 7%-ით მეტია, ვიდრე 2023 წელს. პატიმრობაში მყოფი ჟურნალისტების რაოდენობა გაიზარდა ისეთ ქვეყნებში, როგორებიცაა რუსეთი და ისრაელი.

დაღუპულ ჟურნალისტთა მესამედი ღაზას სექტორში მოკლეს. 2023 წლის 7 ოქტომბრის შემდეგ ღაზაში მედიის 145 თანამშრომელი დაიღუპა. მათ შორის 35-ის დაღუპვა უშუალოდ მათ საქმიანობასთან იყო დაკავშირებული. უკრაინის წინააღმდეგ რუსეთის სრულმასშტაბიანი აგრესიის დაწყების შემდეგ უკრაინაში 13 ჟურნალისტი დაიღუპა.

ყველაზე მეტი ჟურნალისტი პატიმრობაში 4 ქვეყანაში იმყოფება. ესენია ჩინეთი და მასში შემავალი ჰონკონგი (124), მიანმარი (61), ისრაელი (41) და ბელარუსი (40). რუსეთში მხოლოდ 2024 წელს 8 ჟურნალისტი იყო დაპატიმრებული.