ევროპარლამენტმა ფონ დერ ლაიენს ნდობა გამოუცხადა

ევროპარლამენტმა ევროკომისიის თავმჯდომარეს, ურსულა ფონ დერ ლაიენს ნდობა გამოუცხადა. ფონ დერ ლაიენს მხარი დაუჭირა 360-მა ევროპარლამენტარმა, ხოლო 175 -მა წინააღმდეგ მისცა ხმა. ამის შესახებ Deutche Welle იუწყება.

ფონ დერ ლაიენისთვის უნდობლობის გამოსაცხადებლად ევროპარლამენტის წევრთა 2/3 იყო საჭირო. ევროკომისიის ხელმძღვანელი კენჭისყრის დროს იტალიაში იმყოფებოდა.

ფონ დერ ლაიენისთვის უნდობლობის გამოცხადების შუამდგომლობით ევროპარლამენტს რუმინელმა დეპუტატმა გეორგე პიპერიმ მიმართა. პიპერი „ევროპელი კონსერვატორების და რეფორმისტების“ კოალიციის წევრია, სადაც იტალიის, პოლონეთის, საფრანგეთის და ესპანეთის ულტრამემარჯვენე პარტიები შედიან. სარჩელის ავტორმა ევროკომისია რუმინეთში ჩატარებულ საპრეზიდენტო არჩევნებში ჩარევაში დაადანაშაულა.

თავად ფონ დერ ლაიენმა მისი უნდობლობის საკითხის დაყენებას „ინსტიტუტებს შორის განხეთქილების გაჩენის მცდელობა“ უწოდა. მისი თქმით, ამით ხდება საზოგადოების პოლარიზაცია და ასე ხდება დემოკრატიის მიმართ უნდობლობის გაჩენა“.

ფონ დერ ლაიენის მიმართ კრიტიკა გამოწვეული იყო COVID19-ის პანდემიის დროს მისი მიმოწერით Pfizer-ის გენერალურ დირექტორთან ალბერტ ბურლასთან. ევროკომისია და Pfizer-ის ხელმძღვანელობა ევროკავშირისთვის 35 მლრდ ევროს ღირებულების ვაქცინის შეძენის საკითხს განიხილავდნენ. გაზეთი The New York Times ფონ დერ ლაიენს იმაში ადანაშაულებს, რომ ის მოლაპარაკების პროცესზე უშუალო გავლენას ახდენდა, ხოლო შეძენილი ვაქცინების რაოდენობა აუცილებელ დოზებს ბევრად აღემატებოდა.