„საკმარისია დათმობები, პუტინთან და აგრესიულ რუსეთთან არანაირი დათმობები და ფაქიზი თამაში წარმატებამდე არ მიგვიყვანს“ - დონალდ ტუსკი

პოლონეთის პრემიერ-მინისტრმა დონალდ ტუსკმა „ევროპასა და მთელ დასავლეთს აგრესიული რუსეთის წინაშე სიმტკიცისა და სოლიდარობისკენ მოუწოდა“, - ამის შესახებ მან პოლონეთისა და ბელორუსის საზღვარზე ევროკომისიის პრეზიდენტთან ერთობლივი ვიზიტის დროს განაცხადა.

ტუსკმა ხაზგასმით აღნიშნა, რომ უკრაინაში ომის ბოლო დღეები და კვირები ძალიან ნათლად აჩვენებს, რომ „რუსეთის ლიდერ ვლადიმერ პუტინთან და აგრესიულ რუსეთთან არანაირი დათმობა და არანაირი ფაქიზი თამაში წარმატებამდე არ მიგვიყვანს, არ იძლევა ჩვენი უსაფრთხოების გარანტიას“.

პოლონეთის პრემიერ-მინისტრმა ხაზგასმით აღნიშნა, რომ უკვე საკმარისი დათმობები იყო.

„საკმარისია დათმობები, ჩვენ უნდა ვიყოთ მკაცრები და კარგად მომზადებულები. პოლონეთი კარგად ემზადება და ევროკავშირი და თქვენ პირადად, ქალბატონო პრეზიდენტო, ასევე, აქ ხართ, რათა ევროპაში ყველა დაარწმუნოთ, რომ ეს საზღვარი არის საზღვარი, რომელიც ჩვენ უნდა დავიცვათ და რომელშიც, ასევე, უნდა ჩავდოთ ევროპული ფული“, - განაცხადა პოლონეთის აღნიშნა მთავრობის მეთაურმა.

მისი თქმით, პოლონეთი მომავალ წელს 200 მილიარდი ზლოტის ინვესტირებას გეგმავს თავდაცვაში.

„მომავალ წელს პოლონეთი 200 მილიარდი ზლოტის ინვესტირებას აპირებს თავდაცვაში, თავდაცვის ინდუსტრიასა და პოლონეთის არმიაში. ამიტომ, ჩვენ სერიოზულად ვეკიდებით ჩვენს პასუხისმგებლობას და ველით, რომ ევროპის ყველა ინსტიტუტი და ქვეყანა აღმოსავლეთ საზღვრის უსაფრთხოების საკითხს ისეთივე სერიოზულობით მოეკიდება და მკაცრ პოზიციას დაიკავებს აგრესორისა და რუსეთის მიმართ“, - დასძინა პოლონეთის პრემიერმა.