ახალციხეში ყირიმ-კონგოს ჰემორაგიული ცხელების 6 შემთხვევა დაფიქსირდა

ახალციხის მუნიციპალიტეტის ტერიტორიაზე ყირიმ-კონგოს ჰემორაგიული ცხელების 6 შემთხვევა დაფიქსირდა. დაავადება ერთ კაცსა და ხუთ ქალს დაუდასტურდა. ყირიმ–კონგოს შემთხვევები გამოვლინდა ჭვინთაში, საყუნეთში, მუსხში კლდეში, ქალაქ ვალესა და ქალაქ ახალციხეში.

„ყველა შემთხვევაზე განხორციელებულია ეპიდკვლევა, ხოლო პაციენტებს შესაბამისი მკურნალობა უტარდებათ. ინფორმაცია შემთხვევებთან დაკავშირებით გადაგზავნილია სსიპ ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნულ ცენტრში, სოფლის ექიმებთან და სსიპ სურსათის ეროვნული სააგენტოს სამცხე-ჯავახეთის რეგიონულ სამმართველოში”, – აღნიშნული ინფორმაცია ახალციხის მერიამ "სამხრეთის კარიბჭეს" საზოგადოებრივი ჯანდაცვის ცენტრზე დაყრდნობით მიაწოდა.

როგორია პაციენტების მდგომარეობა და რომელ კლინიკებში იმყოფებიან ჩვენთვის უცნობია, ახალციხის საზოგადოებრივი ჯანდაცვის ცენტრის ხელმძღვანელი, ფატი ხაბულიანი „სამხრეთის კარიბჭეს“ სატელეფონო ზარს არ პასუხობს.

13 მაისის მონაცემებით, მიმდინარე წელს სამცხე–ჯავახეთში ადამიანის ყირიმ–კონგოთი დააავადების 10 შემთხვევაა გამოვლენილი. აპრილში ასპინძაში ინფიცირების 4 შემთხვევა დაფიქსირდა. ოთხივე პაციენტი თავს კარგად გრძნობს.

ინფორმაციას, „სამხრეთის კარიბჭე“ ავრცელებს.

ასევე საინტერესოა:

🔵 „ბორჯომის“ თანამშრომლები ხელმძღვანელობის მხრიდან შანტაჟსა და იძულებაზე საუბრობენ

🔵 სოფლის მეურნეობის სამინისტრო: მარაგი დღეისათვის გვაქვს საკმარისზე მეტი, თუმცა გვაქვს ფქვილის და არა ხორბლის სახით

🔵 ნინო ნადირაძე: მიხეილ სააკაშვილს ყველა საჭირო გამოკვლევა უტარდება