დამტკიცდა „ნაციონალური მოძრაობისა“ და გახარიას პარტიის კოალიცია - სოზარ სუბარი

საბოლოოდ დამტკიცდა „ნაციონალური მოძრაობისა“ და გახარიას პარტიის კოალიცია, - ამის შესახებ „ქართული ოცნების“ ცენტრალურ ოფისში გამართულ ბრიფინგზე სოზარ სუბარმა განაცხადა. 

„დღეს, ჩხოროწყუს საკრებულოში მომხდარი ფაქტით, როდესაც გახარიას პარტიის წარმომადგენელი ჩხოროწყუს საკრებულოს თავმჯდომარედ სწორედ „ნაციონალური მოძრაობის“ მხარდაჭერით აირჩიეს, უკვე ოფიციალურად გაფორმდა პარტია „საქართველოსთვის“ და „ნაციონალური მოძრაობის“ კოალიცია.

ამასთანავე, მომხდარი კიდევ ერთხელ ააშკარავებს ტყუილს, თითქოს გახარიას პარტია „ნაციონალურ მოძრაობასთან“ თანამშრომლობას და კოალიციას გამორიცხავდა. ეს იყო მტკნარი სიცრუე, რაც დღეს უკვე ყველასთვის აშკარა გახდა.

რეალურად, მთელი ეს თვეები, ეს ორი ძალა საკუთარი ალიანსის ოფიციალურად გაფორმებისთვის ემზადებოდა, დღეს კი, „ნაციონალური მოძრაობის“ სრული მხარდაჭერით, გახარიას პარტიის წარმომადგენელი ჩხოროწყუს საკრებულოს თავმჯდომარედ აირჩიეს.

ეს არის მათი კოალიციის პირველი ოფიციალური პრეცედენტი და ბუნებრივია, მოსალოდნელია, რომ ამის შემდეგ, სხვა მუნიციპალიტეტებში, სადაც ამის საშუალება აქვთ, მსგავსი ალიანსის შექმნის მცდელობები კიდევ ექნებათ.

დადასტურდა, რომ აღნიშნული პარტიები ერთი ძალის ორი სხვადასხვა განშტოებაა და ისინი, უკვე რადიკალებისა და მოღალატეების გაერთიანებით, შეეცდებიან რამდენიმე მუნიციპალიტეტში განვითარების შეფერხებას“, – განაცხადა სუბარმა.

ცნობისთვის, გიორგი გახარიას პარტიის "საქართველოსთვის" წევრი, პოეტი შოთა წურწუმია ჩხოროწყუს საკრებულოს თავმჯდომარედ 23 დეკემბერს აირჩიეს.

შოთა წურწუმიას 14-მა დეპუტატმა დაუჭირა მხარი.

ასევე საინტერესოა:

🔵 ჩხოროწყუს საკრებულოს თავმჯდომარედ გიორგი გახარიას პარტიის წევრი - პოეტი შოთა წურწუმია აირჩიეს

🔵 სოფიო ხორგუანი: გახარიამ უფასო საზოგადოებრივი ტრანსპორტის იდეა რომ შემოგვთავაზა, ნარკომანობა დააბრალეთ - ჰოდა, გადაიხადეთ ლარი იმაში, რაც 50 თეთრი ღირდა

🔵როკის გვირაბთან ზვავში მოყოლილი კიდევ ერთი რუსი სამხედროს ცხედარი იპოვეს