დავით მათიკაშვილი ლორა თორნტონის განცხადებაზე: ეს ადამიანები პირდაპირი მნიშვნელობით, მტრულად არიან განწყობილი ჩვენი ქვეყნისადმი

პარლამენტის საპროცედურო საკითხთა და წესების კომიტეტის თავმჯდომარე, დავით მათიკაშვილი მაკკეინის ინსტიტუტის გლობალური დემოკრატიის პროგრამების უფროსის, ლორა თორნტონის განცხადებას გამოეხმაურა და აღნიშნა, რომ „ეს ადამიანები საქართველოს მიმართ მტრულად არიან განწყობილი“.

„იმ მოცემულობაში, როდესაც ისინი მოისაკლისებენ იმას, რომ გვამები არ იყო და სისხლი არ დაიღვარა კონკრეტული პროტესტების დროს, როდესაც ქვეყანას უსურვებენ ეკონომიკურ კრიზისს და როცა ყველა მათი განცხადება - ამ ქალბატონის და ასევე ამ ინსტიტუტის სხვა წარმომადგენლების, მათ შორის სალომე ზურაბიშვილის განცხადებები არის ჩვენი სახელმწიფოს სუვერენიტეტის საწინააღმდეგოდ მიმართული და ქვეყანაში არეულობის მოსაწყობად გამიზნული, ერთადერთი დასკვნა შეგვიძლია გამოვიტანოთ, რომ ეს ადამიანები პირდაპირი მნიშვნელობით, მტრულად არიან განწყობილი ჩვენი ქვეყნისადმი“, - აცხადებს დავით მათიკაშვილი.

ინფორმაციისთვის, ლორა თორნტონის განცხადებით, მომიტინგეებმა საქართველოში პროტესტი სამოქალაქო დაუმორჩილებლობასა და გაფიცვაში უნდა გადაიყვანონ.

მისივე თქმით, საქართველოში ეკონომიკური კრიზისის შექმნაა საჭირო, რათა მომიტინგეებმა ხელისუფლება დაამარცხონ.