დეზერტირების ბაზართან ურიკაზე კაცი გაიყინა - კალაძე ამბობს, რომ მას ჰქონდა სახლი

თბილისის მერი კახა კალაძე ჟურნალისტებს აკრიტიკებს და ამბობს, რომ რამდენიმე დღის წინ, „დეზერტირების ბაზარში“ ურიკაზე გაყინულ კაცს ბინა ჰქონდა.

როგორც კალაძემ მუნიციპალიტეტის მთავრობის სხდომაზე აღნიშნა, მედიასაშუალებების ნაწილმა გაავრცელა ინფორმაცია, თითქოს, გარდაცვლილ პიროვნებას არ ჰქონდა სახლი და ღამეს ღია ცის ქვეშ ათევდა.

„ძალიან სამწუხარო ფაქტის მოწმენი გავხდით რამდენიმე დღის წინ. „დეზერტირების ბაზარში“ გარდაცვლილი იპოვეს ადამიანი. ეს ტრაგიკული ამბავი ჩვენი მედიასაშუალებების ნაწილმა ისევ სიცრუის, დეზინფორმაციის გავრცელების საბაბად გამოიყენა და საზოგადოებას ამცნო, რომ გარდაცვალების მიზეზი გახდა სხეულის გაყინვა, რადგან ეს პიროვნება იყო უსახლკარო და ღამეს ათევდა ღია ცის ქვეშ.

სინამდვილეში, გარდაცვლილი პიროვნება არ იყო უსახლკარო, მას სახელმწიფოსგან მიღებული ჰქონდა ბინა.

რასაკვირველია, ნებისმიერი ჟურნალისტი, რომელიც პატივს სცემს საკუთარ პროფესიას და მაყურებელს, დაელოდებოდა ექსპერტიზის დასკვნას, გადაამოწმებდა შესაბამის უწყებაში, ნამდვილად უსახლკაროდ ითვლებოდა თუ არა გარდაცვლილი და ამის შემდეგ გაავრცელებდა ინფორმაციას.

აი, ასე ყოველდღიურად გამოგონილ და ცილისმწამებლურ ისტორიებს ვისმენთ, რომლის მიზანიც სახელმწიფო უწყებების დისკრედიტაციაა და ამ მიზნით, ნებისმიერ საშუალებას იყენებენ“, – განაცხადა დედაქალაქის მერმა.

დეზერტირების ბაზართან 60 წლის კაცი, გაყინული 24 დეკემბერს იპოვეს.

ამავე თემაზე:

🔵 "შობას გილოცავთ! თუმცა, ქრისტე გუშინვე გაიყინა ქუჩაში, ვერავინ იცნო" - ხატმწერი დავით ხიდაშელი, დეზერტირების ბაზართან 60 წლის მამაკაცის გარდაცვალებას ეხმაურება

🔵 დეზერტირების ბაზარში მამაკაცი ურიკაზე გაყინული იპოვეს - უბედური შემთხვევა თბილისში