გია ვოლსკი მმართველი გუნდის საჩივრებზე: ეს არის სახელმწიფოს მხრიდან გადადგმული ნაბიჯი, რომ როგორმე თავი დაიცვას ფსიქოლოგიური ტერორისგან

„ქართული ოცნებისთვის“ თვითმიზანი არ არის ვინმეს დასჯა. ეს არის სახელმწიფოს მხრიდან გადადგმული ნაბიჯი, რომ როგორმე თავი დაიცვას ფსიქოლოგიური ტერორისგან, - ამის შესახებ პარლამენტის პირველმა ვიცე-სპიკერმა გია ვოლსკიმ სოციალურ ქსელში გამოქვეყნებულ პოსტებთან დაკავშირებით მმართველი გუნდის მიერ მომზადებულ საჩივრებზე საუბრისას განაცხადა.

საუბარია საჩივარზე, რომელიც სახელმწიფო პოლიტიკური თანამდებობის პირის სიტყვიერ შეურაცხყოფას, ან მის მიმართ რაიმე შეურაცხმყოფელ ქმედებას ეხება.

ვოლსკის თქმით, მთელ რიგ ევროპულ ქვეყნებში გაცილებით მკაცრი სასჯელები არსებობს ასეთი ქმედებისათვის.

„ქართული ოცნებისთვის“, რასაკვირველია, თვითმიზანი არ არის ვინმეს დასჯა. ეს არის რეალურად სახელმწიფოს მხრიდან გადადგმული ნაბიჯი, რომ როგორმე თავი დაიცვას ამ ფსიქოლოგიური ტერორისგან. მით უმეტეს, თუ ეს ქმედებები არ არის ემოციაზე აყოლა, ეს არის გააზრებული გეგმის ნაწილი, რომელიც მიმართულია საქართველოში ამ ზიზღის ენის და აგრესიის დანერგვა-გავრცელებისკენ.

მთელ რიგ ევროპულ ქვეყნებში გაცილებით უფრო მკაცრი სასჯელებია ასეთი ქმედებისათვის, ვინაიდან ეს წარმოშობს პროცესებს, რომელიც შემადგენელი ნაწილია საკმაოდ სერიოზული დივერსიისა, ჩანაფიქრისა, კონსპირაციისა, რომელიც საქართველოს წინააღმდეგ ხორციელდება და ხშირ შემთხვევაში, დაფინანსებულია“, - განაცხადა გია ვოლსკიმ.