გიგი უგულავას და თბილისი მოლთან დაკავებულ კიდევ 7 პირს საპატიმრო გირაო შეეფარდათ

 სასამართლომ პროკურატურის შუამდგომლობა დააკმაყოფილა და თბილისი მოლთან აქციაზე სისხლის სამართლის წესით დაკავებულ 8 პირს აღკვეთის ღონისძიების სახით 5 000-ლარიანი საპატიმრო გირაო შეუფარდა, რაც იმას ნიშნავს, რომ ბრალდებულები საპატიმროს გირაოს გადახდის შემდეგ დატოვებენ.

დაცვის მხარე ბრალდებულების აღკვეთის ღონისძიების გარეშე დატოვებას ითხოვდა.

შეგახსენებთ, გიგი უგულავა, ირაკლი წიგნაძე, ნიკოლოზ კუტუბიძე, ვასილ ელიავა, ირაკლი ტაბლაძე, ნიკოლოზ ქუმსიშვილი, ალექსანდრე გოგოლაძე და დიმიტრი ბიძინაშვილი სტრატეგიული ან განსაკუთრებული მნიშვნელობის ობიექტის ჯგუფურად ბლოკირების მცდელობის ბრალდებით 2 თებერვალს დააკავეს.

„გამოძიებით დადგინდა, რომ ბრალდებულები, მიმდინარე წლის 2 თებერვალს, თბილისში, აღმაშენებლის ხეივნის ტერიტორიაზე გამართული აქციისას, სამართალდამცველების არაერთგზის მოწოდების მიუხედავად, ჯგუფურად, უკანონოდ შეეცადნენ საერთაშორისო მნიშვნელობის საავტომობილო გზის ბლოკირებას...

მიუხედავად შინაგან საქმეთა სამინისტროს მიერ გავრცელებული გამაფრთხილებელი განცხადებებისა და ადგილზე მყოფი სამართალდამცველების მხრიდან გაკეთებული არაერთი მოწოდებისა, რომ აქციის წევრებს არ მოეხდინათ საერთაშორისო მნიშვნელობის საავტომობილო გზის ბლოკირება , შეკრების დაწყებიდან მალევე აქციის მონაწილეთა ნაწილი, არ დაემორჩილა პოლიციის კანონიერ მოთხოვნას, გადავიდა გზის სავალ ნაწილზე და შეეცადა საავტომობილო გზის ბლოკირებას“, - აცხადებენ შინაგან საქმეთა სამინისტროში.