ირაკლი კირცხალია ოპოზიციაში დაპირისპირებაზე: უმორალო, უპრინციპო ადამიანების ერთმანეთში და მათ ე.წ. ბაბლში მიმოწერა, თუ რა განწყობებს ქმნიან, არ ღირს ჩვენი მხრიდან სერიოზულ კომენტარად

„უმორალო, უპრინციპო ადამიანების ერთმანეთში და მათ ე.წ. ბაბლში მიმოწერა, თუ რა განწყობებს ქმნიან, არ ღირს ჩვენი მხრიდან სერიოზულ კომენტარად“, - ასე ეხმაურება ფრაქცია „ქართული ოცნების“ თავმჯდომარის პირველი მოადგილე ირაკლი კირცხალია ოპოზიციაში არსებულ დაპირისპირებას.

მისი თქმით, ურთიერთშეურაცხმყოფელი განცხადებები მათ რეალურ სახეს აჩვენებს.

„აგენტების ბაზარზე იმიტომ ვხედავთ ამდენ გადანომრილ, გადაღებილ ე.წ პარტიებს რომ ეს შიდა ბატალიებიც, ამ დივერსიფიცირების სცენარის ნაწილი იყო და არის. ეს არის ჩემი აზრი და არამხოლოდ ჩემი აზრი, რომ საზოგადოება კიდევ ერთხელ უტიფრად შეეყვანათ შეცდომაში, როგორც მათ, ასევე, მათ პატრონებს, რათა დაერწმუნებინათ საზოგადოება თითქოს რომელიმეს რვიანი, შვიდიანი, უბრალოდ გავიხსენოთ რამდენი გაერთიანება და რამდენი ფანჩატური გვაქვს ნანახი ბოლო წლებისა და თვეების განმავლობაში. ეს ყველაფერი იყო სცენარის ნაწილი და გრძელდება.

2 დანაყოფი უკვე ცნობილია, რომელსაც მიუვიდა დავალება და იღებს თვითმმართველობის არჩევნებში მონაწილეობას, დარჩა რამდენიმე დანაყოფი, მაგალითად რვიანი, როგორ ახლა მოიხსენიებენ, რომელსაც აქვს კონკრეტული დავალება, რომ რაღაც არეულობა შემოიტანოს ჩვენს ქვეყანაში.

ასეთი, უმორალო, უპრინციპო ადამიანების ერთმანეთში და მათ ე.წ. ბაბლში მიმოწერა, თუ რა განწყობებს ქმნიან, არ ღირს ჩვენი მხრიდან სერიოზულ კომენტარად. თითოეული შეურაცხყოფა და გამონათქვამი თავიანთი ე.წ. მედიებიდან, მიუთითებს მხოლოდ მათ მორალურ სახეზე“, - აღნიშნავს კირცხალია.