„მოვუწოდებთ დესტრუქციულ ძალებს თავი შეიკავონ დანაშაულებრივი ქმედებების ჩადენისგან“ - სუსი

„მოვუწოდებთ დესტრუქციულ ძალებს თავი შეიკავონ დანაშაულებრივი ქმედებების ჩადენისგან და დარჩნენ სამართლებრივ ჩარჩოებში“, - განცხადებას სახელმწიფო უსაფრთხოების სამსახური ავრცელებს.

„ბოლო დროს სოციალურ ქსელებსა და მასობრივი ინფორმაციის საშუალებებში სხვადასხვა პირის მიერ ვრცელდება დანაშაულის ნიშნების შემცველი შინაარსის საჯარო განცხადებები და მოქალაქეები განზრახ თუ გაუცნობიერებლად პირდაპირ მოუწოდებენ თანამოაზრეებს რევოლუციისა და ხელისუფლების დამხობისკენ, მათ შორის ძალადობრივი გზებით“, - წერია განცხადებაში.

როგორც უწყება აღნიშნავს, მოწოდება საქართველოს კონსტიტუციური წყობილების ძალადობით შეცვლისკენ ან სახელმწიფო ხელისუფლების დამხობისკენ, ან/და ასეთი მოწოდების შემცველი მასალის გავრცელება, აგრეთვე ამავე მიზნით შეიარაღებისაკენ მოწოდება, წარმოადგენს დანაშაულებრივ ქმედებას, რომელიც გათვალისწინებულია საქართველოს სსკ-ის 317-ე მუხლით და ისჯება 3 წლამდე თავისუფლების აღკვეთით.

„სახელმწიფო უსაფრთხოების სამსახური, თავისი კომპეტენციის ფარგლებში, განახორციელებს კანონით გათვალისწინებულ ყველა სამართლებრივ ღონისძიებას, საქართველოს კონსტიტუციური წყობილების დასაცავად და სახელმწიფო ხელისუფლების არაკონსტიტუციური, ძალადობრივი გზით შეცვლის თავიდან ასაცილებლად“, - წერია სახელმწიფო უსაფრთხოების სამსახურის მიერ გავრცელებულ განცხადებაში.

დღეს სახელმწიფო უსაფრთხოების სამსახურის გამომძიებლებმა მაგისტრატი მოსამართლის თანდასწრებით მოძრაობა „თავისუფალი ზონისა“ და მოძრაობა „შეცვალეს“ წევრები გამოკითხეს.

ხელისუფლების დამხობის მიზნით შეთქმულების საქმეზე გამოძიების ფარგლებში, თბილისის საქალაქო სასამართლოში სულ ექვსი პირი გამოიკითხა.

ასევე დაგაინტერესებთ:

🔴 მამუკა მდინარაძე: პირველი შეცდომა მაშინ დაუშვეს, როდესაც აქცია 7 ნოემბერს დააანონსეს

🔴 რეანიმაციულ განყოფილებაში პაციენტების რაოდენობა იმატებს

🔴  ეკონომისტები ფასების ზრდას კიდევ ელოდებიან