ნინო წილოსანი: ანტისახელმწიფოებრივი, ანტიკონსტიტუციური პოლიტიკური პარტიები უნდა აიკრძალოს, ეს ასეულობით შემთხვევაში აქვს გაკეთებული ევროპის სხვადასხვა ქვეყანას, მათ შორის უკრაინას და მოლდოვას

„ანტისახელმწიფოებრივი, ანტიკონსტიტუციური პოლიტიკური პარტიები უნდა აიკრძალოს. ეს ასეულობით შემთხვევაში აქვს გაკეთებული ევროპის სხვადასხვა ქვეყანას, მათ შორის უკრაინას და მოლდოვას, თუმცა ვხედავთ ევროპიდან თითის ქნევას, რომ პარტიების აკრძალვა საქართველოს ევროკავშირთან დაახლოებას შეუშლის ხელს“, - განაცხადა პარლამენტის ვიცე-სპიკერმა ნინო წილოსანმა გადაცემაში „დღის ქრონიკა“.

წამყვანმა ჰკითხა რესპონდენტს, რამდენად შეიძლება გავლენა მოახდინოს საკონსტიტუციო სასამართლოში 5 პარტიის აკრძალვის სარჩელზე მსჯელობამ და თეორიულად სარჩელის დაკმაყოფილებამ ბრიუსელის დამოკიდებულებაზე საქართველოს ხელისუფლების მიმართ.

„ახლა იმ გამოწვევის წინაშე ვდგავართ, რომ საკონსტიტუციო დონეზე აკრძალული პარტიები ევროპის შემთხვევაში ნორმაა, ჩვენს შემთხვევაში - კრიტიკული კომენტარების გაკეთების წინაპირობა. ევროპაში 100-ზე მეტი პარტიაა აკრძალული ზუსტად იმ პრინციპებით, რომლებზეც ჩვენ ვაპელირებთ. პრინციპი ერთია - ანტისახელმწიფოებრივი, ანტიკონსტიტუციური პოლიტიკური პარტიები უნდა აიკრძალოს. ეს ასეულობით შემთხვევაში აქვს გაკეთებული ევროპის სხვადასხვა ქვეყანას, მათ შორის უკრაინას და მოლდოვას, თუმცა ვხედავთ ევროპიდან თითის ქნევას, რომ პარტიების აკრძალვა საქართველოს ევროკავშირთან დაახლოებას შეუშლის ხელს.

2012 წლის შემდეგ, 14 წელია ვითმენთ ამ პარტიების არსებობას და ირონიულად და ცინიკურად ამ პარტიებს ოპოზიციას ეძახიან მაშინ, როდესაც ამაზე უფრო მავნებლური და ანტიქართული დაჯგუფებები არ არსებობს. ერთხელ და სამუდამოდ უნდა ვთქვათ უარი ამაზე და გავაჯანსაღოთ პოლიტიკური ველი“, - აღნიშნა წილოსანმა.