ოთარ გრიგოლია: ძალიან მნიშვნელოვანია, რომ ჩვენ არცერთ ეტაპზე, არცერთ რეზოლუციას და არცერთ ასეთ დოკუმენტს, რომელიც ევროპის სხვადასხვა ინსტიტუტში იყო მიღებული, პასუხის გარეშე არ დავტოვებთ

 ჩვენი გამოსვლების შემდეგ ძალიან ბევრი ადამიანი მოვიდა და გამოხატა სოლიდარობა იქიდან გამომდინარე, რომ არ ჰქონდათ საკმარისი ინფორმაცია იმისათვის, რათა სწორი დასკვნები გაეკეთებინათ. შესაბამისად, ვფიქრობ ასეთ გამოსვლებს ძალიან დიდი მნიშვნელობა აქვს, - განაცხადა გადაცემაში „იმედი LIVE“ თბილისის საკრებულოს ფრაქცია „ქართული ოცნება-დემოკრატიული საქართველოს“ თავმჯდომარემ, ოთარ გრიგოლიამ ევროპის საბჭოს ადგილობრივ და რეგიონულ ხელისუფლებათა კონგრესის მონიტორინგის კომიტეტის სხდომასთან დაკავშირებით.

აღნიშნული განცხადებით მან უპასუხა წამყვანის კითხვას: „გარდა პროტესტთან დაკავშირებული საკითხებისა, რამდენადაც ვიცით, ასევე საუბარი შეეხო ევროინტეგრაციის პროცესს და გამოთქმულია მოსაზრება, თითქოს საქართველოს ხელისუფლების ინიციატივით შეჩერდა ეს პროცესი. თქვენ რა არგუმენტები წარადგინეთ და როგორი იყო რეაქციები“.

როგორც ოთარ გრიგოლიამ აღნიშნა, ქართული დელეგაციის წევრები საუბრობდნენ იმაზე, რომ საქართველოს ხელისუფლებას ეს პროცესი არ შეუჩერებია.

„აქ იყო ძალიან მნიშვნელოვანი ხაზი, ისინი ამბობდნენ, რომ საქართველოს ხელისუფლებამ შეაჩერა ევროინტეგრაციის პროცესი და ჩვენ, რა თქმა უნდა, თავისთავად ცხადია ვსაუბრობდით იმაზე, რომ საქართველოს ხელისუფლებას ეს არ შეუჩერებია. უბრალოდ, ევროკავშირმა რატომღაც გადაწყვიტა, რომ ყველა ის ევროინტეგრაციის პროცესის შემდეგი ეტაპი გამოეყენებინა პოლიტიკურ იარაღად ჩვენი ხელისუფლების წინააღმდეგ. ჩვენ, რა თქმა უნდა, ღია ვართ და პირიქით, მზად ვართ, რომ ევროინტეგრაციის გზა გავაგრძელოთ. თუ ევროკავშირი მზად არის გაფართოებისთვის, ჩვენ ყველანაირად ხელს შევუწყობთ ამ პროცესს, მაგრამ ეს ტერმინი გამოყენებული იყო იმისათვის, რომ მათ დაესაბუთებინათ, ანუ, საქართველომ შეაჩერა ევროინტეგრაციის გზა და ამის გამო ხალხი გამოვიდა ქუჩაში. ხალხი რომ გამოვიდა ქუჩაში, ეს განპირობებულია თითქოს საქართველოს მხრიდან ევროპაზე უარის თქმით. იქ კონგრესის სხვა წევრებიც არიან. ცხადია, ჩვენ ეს განვმარტეთ, რომ პროცესი ასე არ მიმდინარეობდა და რომ საქართველოს ხელისუფლებაზე იყო ძალიან დიდი ზეწოლა, სხვადასხვა მხრიდან. მათ შორის, ევროპული ინსტიტუტების მხრიდან და ჩვენ ყოველთვის მზად ვართ, ახლაც ვაცხადებთ მზაობას იმისათვის, რომ ევროინტეგრაციის პროცესი რაც შეიძლება სწრაფად აღდგეს და დაუბრუნდეს ძველ გზას.

ძალიან მნიშვნელოვანია, რომ ჩვენ არცერთ ეტაპზე, არცერთ რეზოლუციას და არცერთ ასეთ დოკუმენტს, რომელიც ევროპის სხვადასხვა ინსტიტუტში იყო მიღებული, პასუხის გარეშე არ დავტოვებთ და ჩვენს პარტნიორებს, წევრ ქვეყნებს, რომლებიც უპასუხობის გამო შეიძლება შეცდომაში იყვნენ შეყვანილი, მათ ინფორმირებას ვახდენთ და მაქსიმალურად ვცდილობთ, რომ წევრ ქვეყნებთან აქტიურად ვითანამშრომლოთ. ძალიან ბევრი ადამიანი ჩვენი გამოსვლების შემდეგ მოვიდა ჩვენთან და გამოხატა სოლიდარობა იქიდან გამომდინარე, რომ არ ჰქონდათ საკმარისი ინფორმაცია იმისათვის, რომ სწორი დასკვნები გაეკეთებინათ. შესაბამისად, ვფიქრობ ასეთ გამოსვლებს ძალიან დიდი მნიშვნელობა აქვს“, - აღნიშნა ოთარ გრიგოლიამ.