პაატა იმნაძე: მაღალი ტემპერატურის დროს მოვუწოდებ მოსახლეობას, თავი შეიკავონ გარეთ ყოფნისგან და მიიღონ დიდი ოდენობით სითხე

„მაღალი ტემპერატურის დროს მოვუწოდებ მოსახლეობას, თავი შეიკავონ გარეთ ყოფნისგან და მიიღონ დიდი ოდენობით წყალი“, - აღნიშნულის შესახებ ჯანდაცვის სამინისტროს, დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორის მოადგილემ განაცხადა. 

პაატა იმნაძე, მოსახლეობას მაღალ ტემპერატურასთან დაკავშირებით, რეკომენდაციებს აძლევს:

„ზაფხულის ცხელ დღეებში თავი უნდა შევიკავოთ გარეთ ყოფნისგან და ვეცადოთ, მაქსიმალურად ჩრდილში ვიყოთ. რეკომენდებულია ღია ფერის ტანსაცმლის ტარება, რადგან ასეთი ქსოვილი უკეთესად ატარებს ჰაერს. მნიშვნელოვანია დიდი რაოდენობით სითხის, განსაკუთრებით კი წყლის მიღება.

თუ გვინდა, სახლში სიგრილე შევინარჩუნოთ, აუცილებელია ფანჯრების გაღება და ფარდების გადაწევა, რათა მზის პირდაპირი სხივები ნაკლებად შემოვიდეს.

კარგი ეფექტი აქვს სველი პირსახოცის ჩამოკიდებასაც - ის ატენიანებს ჰაერს და ხელს უწყობს ტემპერატურის დაქვეითებას. თუმცა, როდესაც ტემპერატურა 35 გრადუსს აჭარბებს, ვენტილატორი ეფექტურობას კარგავს.

ვისაც კონდიცირების საშუალება არ აქვს, შეუძლია ისარგებლოს საზოგადოებრივი სივრცეებით. ღამით აუცილებლად უნდა გაიღოს ფანჯრები, როცა ჰაერი შედარებით გრილია - ეს საცხოვრებელი სივრცის განიავებაში დაგვეხმარება. ორგანიზმის გაგრილებას ასევე ხელს უწყობს სველი პირსახოცის გამოყენება.

მაღალი ტემპერატურის დროს საჭიროა, არ მივიღოთ დიდი რაოდენობით საკვები და მოვერიდოთ ცილებით მდიდარ პროდუქტებს“, - განაცხადა პაატა იმნაძემ.