მარიამ ლაშხმა და გიორგი გაბუნიამ გორის სახელმწიფო უნივერსიტეტის 90 წლისთავისადმი მიძღვნილ ღონისძიებაში მიიღეს მონაწილეობა

პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარემ მარიამ ლაშხმა და კულტურის კომიტეტის თავმჯდომარემ გიორგი გაბუნიამ პარლამენტის წევრებთან ერთად, გორის სახელმწიფო უნივერსიტეტის 90 წლისთავისადმი მიძღვნილ ღონისძიებაში მიიღეს მონაწილეობა.

განათლების, მეცნიერებისა და ახალგაზრდულ საქმეთა კომიტეტის თავმჯდომარემ მარიამ ლაშხმა
ღონისძიების მონაწილეებს სიტყვით მიმართა, უნივერსიტეტის წარმომადგენლებს საიუბილეო თარიღი მიულოცა და რეგიონში გორის უნივერსიტეტის მნიშვნელობაზე ისაუბრა.

„გორის სახელმწიფო უნივერსიტეტი უკვე 90 წელია საგანმანათლებლო ცენტრს წარმოადგენს შიდა ქართლის მხარეში. დღესდღეობით, უნივერსიტეტი ქმნის შესაძლებლობებს დროებით ოკუპირებული ტერიტორიებიდან იძულებით გადაადგილებული პირებისთვის და ოკუპირებულ ტერიტორიებზე მცხოვრები ჩვენი თანამოქალაქეებისთვის, მიიღონ ხარისხიანი უმაღლესი განათლება. განათლების, მეცნიერებისა და ახალგაზრდულ საქმეთა კომიტეტისთვის რეგიონული უნივერსიტეტების მხარდაჭერა იყო, არის და იქნება პრიორიტეტული. იმის გათვალისწინებით, რომ განათლების, მეცნიერებისა და ახალგაზრდობის სამინისტროც იზიარებს ამ პოზიციას, მჯერა, რომ ერთად უფრო მეტ შესაძლებლობებს გავაჩენთ რეგიონში მცხოვრები ახალგაზრდებისთვის“, - განაცხადა მარიამ ლაშხმა.

ღონისძიებას მონაწილეებს სიტყვით ასევე მიმართეს: განათლების, მეცნიერებისა და ახალგაზრდობის მინისტრმა გივი მიქანაძემ, პარლამენტის კულტურის კომიტეტის თავმჯდომარემ გიორგი გაბუნიამ, განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილემ, აკადემიკოსმა გიორგი სოსიაშვილმა და გორის სახელმწიფო უნივერსიტეტის რექტორმა ალექსანდრე მღებრიშვილმა.

ღონისძიების დასასრულს, გორის სახელმწიფო უნივერსიტეტის რექტორმა ალექსანდრე მღებრიშვილმა მარიამ ლაშხი და გიორგი გაბუნია „საიუბილეო სამახსოვრო მედლით“ დააჯილდოვა.

90 წლის საიუბილეო თარიღის აღსანიშნავად, უნივერსიტეტი სამი დღის განმავლობაში მრავალფეროვან კულტურულ და საგანმანათლებლო ღონისძიებებს მასპინძლობს.

საიუბილეო ღონისძიებას საკანონმდებლო, აღმასრულებელი და ადგილობრივი ხელისუფლების, ასევე აკადემიური და სასულიერო სფეროს წარმომადგენლები ესწრებოდნენ.