"სახელი და გვარი რომ არ ეწეროს ზედ, ვერ გაარჩევ სალომე ზურაბიშვილს სალომე სამადაშვილისგან" - კობახიძე პრეზიდენტს ბოლო განცხადებების გამო აკრიტიკებს

"ქართული ოცნების" თავმჯდომარის, ირაკლი კობახიძე, საქართველოს პრეზიდენტს სალომე ზურაბიშვილს ბოლოდროინდელი განცხადებების გამო კვლავ აკრიტიკებს.

"პრეზიდენტი სალომე ზურაბიშვილი, ამ დღეების განმავლობაში, საქართველოს საწინააღმდეგო კამპანიას ეწევა. მისი განცხადებები, რომ ვართ ჩამორჩენილი და ა.შ. რა თქმა უნდა, ამას ემსახურება.

ჩამორჩენილი თუ არის ქვეყანა, გამოდის, რომ კანდიდატობას არ იმსახურებს, მაგრამ ჩვენ გვგონია, რომ საქართველო კი არ არის ჩამორჩენილი, სალომე ზურაბიშვილი ჩამორჩა რაღაცებს.

სალომე ზურაბიშვილი თავისი რიტორიკით დასულია სალომე სამადაშვილის დონეზე, რაც ძალიან სამწუხაროა.

სახელი და გვარი რომ არ ეწეროს ზედ, ვერ გაარჩევ სალომე ზურაბიშვილს სალომე სამადაშვილისგან.

რატომ ხდება ეს - ამასთან დაკავშირებით ჩვენი ეჭვები გვაქვს, მაგრამ სიღრმეში არ შევალ", – განაცხადა კობახიძემ.

„ქართული ოცნების“ წევრისა და ხარაგაულის საკრებულოს თავმჯდომარის მიერ სალომე ზურაბიშვილის დაწყევლასთან დაკავშირებით დასმულ შეკითხვაზე, კობახიძემ განაცხადა:

"კონკრეტულ სიტყვებზე კომენტარს ვერ გააკეთებს, მაგრამ, ზოგადად, მისი თანაპარტიელები ძალიან გულდაწყვეტილები არიან იმ ყველაფრით, რასაც სალომე ზურაბიშვილი აკეთებს.

ჩვენ ვეუბნებოდით მათ, რომ ზურაბიშვილი იყო წარდგენილი როგორც ზეპარტიული კანდიდატი და რეალურად, ის ასე მოქმედებდა გარკვეული პერიოდის განმავლობაში, თუმცა, ვხედავთ, რომ დღეს ის პოზიციონირებს როგორც სალომე სამადაშვილი", – აღნიშნა ირაკლი კობახიძემ.

ცნობისთვის, საქართველოს პრეზიდენტმა სალომე ზურაბიშვილმა 22 ივნისს, მას შემდეგ რაც ქვეყნის პრემიერმა ირაკლი ღარიბაშვილმა საკანონმდებლო ორგანოში მთავრობის წლიური ანგარიში წარადგინა, ბრიფინგი გამართა და პრემიერი ღარიბაშვილი, პარლამენტში გაკეთებული განცხადებების გამო გააკრიტიკა.

ასევე დაგაინტერესებთ: 

* ოხანაშვილი: თუ ქალბატონ პრეზიდენტს მიაჩნია, რომ ასეთი აგდებული დამოკიდებულებით და რიტორიკით უნდა ესაუბროს საქართველოს პარლამენტს, მით უარესი ამ ინსტიტუტისთვის