სოზარ სუბარი: საგამოძიებო კომისიამ უკვე შეასრულა მთავარი ფუნქცია - ადამიანების იმ ნაწილს, რომელსაც ბოლომდე არ აქვთ შუბლის ძარღვი გაწყვეტილი, ისინი იძულებული არიან თქვან, რომ ის რაც იყო, იყო ცუდი

 „კომისიამ უკვე შეასრულა მთავარი ფუნქცია. ადამიანების იმ ნაწილს, რომელსაც ბოლომდე არ აქვთ შუბლის ძარღვი გაწყვეტილი, რომელსაც სინდისის ძალიან მცირე ნაწილი მაინც შერჩენიათ, ისინი იძულებული არიან, დღეს თქვან, რომ ის რაც იყო, იყო ცუდი; ის რაც იყო, იყო საშინელება და ეს უკვე, ძალიან სერიოზული შედეგია“, - განაცხადა გადაცემა „დღის ქრონიკაში“ პარლამენტის საგამოძიებო კომისიის თავმჯდომარის მოადგილემ, „ხალხის ძალის“ თავმჯდომარემ სოზარ სუბარმა.

მან კომისიის მუშაობის შედეგებზე გაამახვილა ყურადღება. კერძოდ, მისივე თქმით, საპარლამენტო დროებითი საგამოძიებო კომისიის მუშაობის სერიოზული შედეგი, ასევე, არის ის, რომ „ნაციონალური მოძრაობის“ რეჟიმის მიერ დაზარალებული უამრავი ადამიანია, რომელთაც მიყენებული ზიანის ანაზღაურება დღემდე ვერ მიიღეს.

„ზოგ შემთხვევაში ეს არის ქონებრივი დანაკარგები, ზოგ შემთხვევაში, როგორც დღეს ვისმენდით, ეს ის არის, რომ წამების მსხვერპლებმა ზიანის ანაზღაურება სახელმწიფოსგან მოითხოვეს და სასამართლო ჯერ არ არის დასრულებული. ამ სასამართლო საქმეების დაჩქარება, ზიანის ანაზღაურება იქნება ძალიან მნიშვნელოვანი შედეგი.

ასევე, პოლიტიკური შედეგი იქნება საკონსტიტუციო სასამართლო, რომელიც სავარაუდოდ, არჩევნების შემდეგ გაიმართება. საქმე წავა საკონსტიტუციო სასამართლოში და რასაც ვისმენთ, მე ვერ წარმომიდგენია, რაიმეზე განსხვავებული გადაწყვეტილება მიიღოს საკონსტიტუციო სასამართლომ, გარდა იმისა, რომ ეს დამნაშავე პარტიები უნდა აიკრძალონ და რეჟიმის შემოქმედებს, რეჟიმის ხელმძღვანელებს, სადაც არ უნდა იყვნენ, რა პარტიაშიც არ უნდა იყვნენ, სამუდამოდ უნდა აეკრძალოთ პოლიტიკაში მოღვაწეობა.

სისხლის სამართლებრივი დევნა იმ ადამიანებზე, რომელთა გვარებიც ახლა ვლინდება - შესაძლოა, ვიცოდით აქამდე, მაგრამ როდესაც საგამოძიებო კომისიაზე მათი გვარები კიდევ ერთხელ გაჟღერდა, ეს არის მტკიცებულება, რომელზეც საქმეები ან უნდა დაჩქარდეს, თუ დაწყებულია გამოძიება, ან ახალ საქმეებზე ძიება უნდა დაიწყოს“, - განაცხადა სუბარმა.