Starring Georgia საინტერესო სიახლეებით ბრუნდება

გვიხარია, რომ სეზონის პირველ ღონისძიებას წლის დასაწყისში ვაანონსებთ და გაძლევთ შესაძლებლობას უკეთ დაგეგმოთ თქვენი მუსიკალური მოგზაურობა, რომელიც გვიანი გაზაფხულიდან დაიწყება!

აჰყევით ვარსკვლავებს 30 მაისს, ამჯერად ციცინათელას პარკში. Starring Georgia-ს 2025 წლის მუსიკალურ სეზონს, როკმუსიკის ისტორიაში ლეგენდარული ბენდი, Guns N' Roses გახსნის. ამ ღონისძიების დაანონსებით Starring Georgia-ს პროექტის კიდევ ერთი ეტაპი იწყება, რომელიც წელს კიდევ უფრო მასშტაბური იქნება და სხვადასხვა ასაკის თუ გემოვნების მსმენელს საუკეთესო მუსიკალურ გამოცდილებას შესთავაზებს.

Guns N' Roses ლოს-ანჯელესში დაარსებული როკბენდია, რომელიც უკვე 40 წელია როკმუსიკის ოლიმპოს მთაზე დამსახურებულ ადგილს არავის უთმობს. კლასიკური როკის ჟღერადობის მეტალის ხასიათთან საინტერესო შეზავებით და საოცრად ენერგიული ლაივშოუების დამსახურებით ამერიკული ბენდი დღემდე არ კარგავს თავის სტატუსს და მნიშვნელობას.

ათეულობით მილიონი გაყიდული ალბომი და მსოფლიოს ყველაზე დიდ სტადიონებსა თუ საკონცერტო დარბაზებში ჩატარებული ტურნეები კიდევ ვერ გამოხატავს იმ მემკვიდრეობას, რომელსაც Guns N' Roses-ის შემოქმედება იტევს. საბედნიეროდ, ამ ყველაფრის ნაწილი მალე საქართველოც გახდება და ეს დიდი ამბების მხოლოდ დასაწყისია.

სწორედ Guns N' Roses- ის მასშტაბების გათვალისწინებით შეირჩა ღონისძიების ლოკაციად შეკვეთილში მდებარე პარკ “ციცინათელას” პარკინგის ტერიტორია, რომელიც 40 000 მელომანს დაიტევს. Guns N' Roses ერთადერთი ბენდი არ იქნება ვისაც ციცინათელაში შეკრებილი მელომანები მოუსმენენ. ციცინათელას სცენაზე ამერიკული როკბენდი Rival Sons წარდგება, რომელიც მთავარი არტისტის მოწვეული ბენდია. ამგვარად შესაძლებლობა გვეძლევა მუსიკის ძალით და თქვენი დახმარებით ხელი შევუწყოთ გურიაში ტურიზმის განვითარებას და 2025 წელს გურია და საქართველო იყოს მუსიკალური ორბიტის მთავარ როლში.

ბილეთების გაყიდვა 20 იანვარს, 11:00 საათზე დაიწყება პლატფორმა TKT.ge-ზე. თუმცა Starring Georgia-ს მუსიკალური ოდისეის ლოიალურ თანამგზავრებს გაქვთ უნიკალური შესაძლებლობა ისარგებლოთ Pre Sale-ით ორი დღით ადრე. თუ უკვე სარგებლობთ Starring Card-ით, 18 იანვარს 11:00 საათზე, არ გამოტოვოთ სპეციალურად თქვენთვის შექმნილი შესაძლებლობა და შეიძინეთ ლიმიტირებული რაოდენობის ბილეთები.

საქართველოს მთავრობის მხარდაჭერით, Starring Georgia გრძელდება. უცვლელი რჩება ჩვენი კომპანიის მთავარი მიზანი: ხელმისაწვდომი გახადოს ქართველი ახალგაზრდებისთვის საკუთარ ქვეყანაში მათი საყვარელი მუსიკოსების მოსმენა, განავითაროს ქვეყნის გასართობი ინდუსტრია და ხელი შეუწყოს საქართველოს პოპულარიზაციას.