"თავად დაიწყებს შიმშილობას თუ ისინი პროტესტის უკიდურეს ფორმას არ შეწყვეტენ" - ადვოკატის თქმით, მიხეილ სააკაშვილი ენმ-ს მოშიმშილე წევრებს თხოვნით მიმართავს

"ექსპრეზიდენტმა მიხეილ სააკაშვილმა თხოვნით მიმართა მოშიმშილეებს, რომ ის თავად დაიწყებს შიმშილობას თუ ისინი პროტესტის უკიდურეს ფორმას არ შეწყვეტენ", - ამის შესახებ მოშიმშილეებს ყოფილი პრეზიდენტის ერთ-ერმა ადვოკატმა გიორგი მშვენიერაძემ გააცნო.

ერთიანი ნაციონალური მოძრაობის თავმჯდომარის, ნიკა მელიას თქმით, მათ არ აქვთ უფლება, დაუშვან, რომ მიხეილ სააკაშვილმა შიმშილობა განაახლოს და შესაბამისად პროტესტს სხვა ფორმით გააგრძელებენ.

"მიხეილ სააკაშვილი განიცდის თითოეული მოშიმშილის ჯანმრთელობის მდგომარეობას და თავადაც იძულებული გახდება, რომ მანაც განაახლოს შიმშილობა, რისი დაშვების უფლებაც არ გვაქვს არცერთ ჩვენგანს, ვინაიდან, მიხეილ სააკაშვილის მიერ შიმშილობის დაწყება იქნება ფატალური შედეგის მომტანი და ამიტომ, თანამებრძოლებთან  ერთად მივიღეთ გადაწყვეტილება, რომ გადავიდეთ ბრძოლის შემდეგ ეტაპზე, რომელიც იქნება მრავალფეროვანი და არაძალადობრივი, მანამ, სანამ ქვეყანაში სამართლიანობა არ გაიმარჯვებს და არ დასრულდება პოლიტიკური მართლმსაჯულება. აქედან გამომდინარე, ჩვენ გადავდივართ ბრძოლის სხვა ეტაპზე", - განაცხადა ნიკა მელიამ.

"მასობრივი შიმშილობა" ენმ-ის ოფისთან პარტიის წევრებმა და მხარდამჭერებმა ექსპრეზიდენტის, მიხეილ სააკაშვილის გათავისუფლების მოთხოვნით 21 დეკემბერს დაიწყეს.

სხვა სიახლეები:

📍 ბექა ვარდოსანიძე დააკავეს - რას ედავება მას გამოძიება

📍შალვა პაპუაშვილი: საქართველოს პარლამენტის სახელით, გილოცავთ ახალ წელს და თითოეულ თქვენგანს, თქვენს ოჯახებს ვუსურვებ ჯანმრთელობას, მშვიდობას და კეთილდღეობას