"უნდა ვეცადოთ, რაც შეიძლება მოკრძალებულად გვქონდეს ახალი წელი" - ამირან გამყრელიძე ეპიდვითარებაზე

დაავადებათა კონტროლის ეროვნული ცენტრის დირექტორი, ამირან გამყრელიძე მოსახლეობას ახალი წლის მოკრძალებულად აღნიშვნისკენ მოუწოდებს.

ამის შესახებ გამყრელიძემ საზოგადოებრივ მაუწყებელთან ინტერვიუში ისაუბრა.

"შემთხვევების არა რადიკალური, თუმცა ნელი ტემპით შემცირება სახეზეა, საქართველომ კრიტიკული პერიოდი გადაიარა და მდგომარეობა სტაბილიზაციისკენ მიდის.

თუმცა, ამ ეტაპზე სიმშვიდის საფუძველი არ გვაქვს, რადგან საქართველოსნაირი პატარა ქვეყნისთვის ყოველდღიურად კორონავირუსით ინფიცირებულთა რიცხვი კვლავ ძალიან დიდია", - აცხადებს გამყრელიძე.

გამყრელიძის თქმით სანამ ინფიცირებულთა დღიური მაჩვენებელი 1000-ზე ნაკლები არ იქნება, სიკვდილიანობის მაჩვენებელი არ შემცირდება.

მან მოსახლეობას უახლოესი დღესასწაულების ვაქცინირებული ადამიანების წრეში, რეგულაციების დაცვით აღნიშვნისკენ მოუწოდა.

"მოგეხსენებათ ახალი წელი ჩვენთვის ერთ-ერთი ყველაზე დიდი დღესასწაულია, ამიტომ უნდა ვეცადოთ რაც შეიძლება მოკრძალებულად გვქონდეს ეს დღესასწაული, ანუ თავი ავარიდოთ ძალიან დიდ შეკრებებს, ყველგან ვიყოთ პირბადით, იქნება ეს შიდა სივრცე თუ გარე სივრცე.

ყველა შეკრება იქნება, ბავშვებისთვის კონცერტი თუ სხვა ასეთი ღონისძიებები, ადამიანები იყვნენ იქ აცრილი, ანუ დაუშვან მხოლოდ მწვანე პასპორტებით", - განაცხადა ამირან გამყრელიძემ.

გასული 24 საათის მონაცემებით, საქართველოში კორონავირუსს კიდევ 64 ადამიანი ემსხვერპლა - გამოჯანმრთელდა 2 234 პაციენტი.

სხვა სიახლეები:

🔲 ვირუსს კიდევ 64 ადამიანი ემსხვერპლა

🔲 "სად ილექება კოვიდი დაინფიცირების შემდეგ და რატომ მძიმდებიან უფრო მეტად ჭარბწონიანები?" - გიორგი ფხაკაძე უახლესი კვლევის შესახებ წერს