ვაკეში მოკლული კაცი ე.წ. კანონიერი ქურდის ძმა, ლევან ჯანგველაძეა

 თბილისის ცენტრში, ჭავჭავაძის გამზირზე გასულ ღამეს მოკლული კაცი ე.წ. კანონიერი ქურდის, მერაბ ჯანგველაძის ძმა, ლევან ჯანგველაძეა. დაჭრილია მისი თანმხლები პირიც. ის ხეჩინაშვილის სახელობის კლინიკაში გადაიყვანეს.

ექიმების თქმით, დაჭრილს მსუბუქი დაზიანება აქვს ფეხის არეში და ის უკვე სახლშია გაწერილი.

მოკლული ჭავჭავაძის ქუჩაზე ახლობლის პანაშვიდზე თანმხლებ პირთან ერთად იმყოფებოდა.

როგორც ცნობილია, იქიდან გამოსვლის შემდეგ, მას შეიარაღებული პირი დახვდა და ცეცხლი გაუხსნა. ჩანაწერში ჩანს, რომ შეიარაღებული კაცი ცეცხლის გახსნის შემდეგ ჭავჭავაძის ქუჩას კვეთს და მიიმალა.

მკვლელობის ადგილზე საგამოძიებო მოქმედებები თითქმის მთელი ღამის განმავლობაში მიმდინარეობდა. სავარაუდო დამნაშავე ჯერჯერობით დაკავებული არ არის.

თვითმხილველებმა ცეცხლსასროლი იარაღიდან 10-მდე გასროლის ხმა გაიგეს. ორი ტყვია მოხვდა ახლოს მდებარე კვების ობიექტსაც.

მომხდარზე გამოძიება სსკ-ის კოდექსის 108-ე [განზრახ მკვლელობა. ისჯება თავისუფლების აღკვეთით ვადით ათიდან თხუთმეტ წლამდე] და 236-ე [ცეცხლსასროლი იარაღის უკანონო შეძენა-შენახვა-ტარება] ისჯება ჯარიმით ან შინაპატიმრობით ვადით ექვსი თვიდან ორ წლამდე ანდა თავისუფლების აღკვეთით ვადით ორ წლამდე.