ლევან მაჭავარიანი: ოპოზიცია რთულ ვითარებაშია და საბაბებს ეძებენ, თავიდან აიცილონ არჩევნებში მონაწილეობა

 ფრაქცია „ქართული ოცნების“ თავმჯდომარის მოადგილე ლევან მაჭავარიანი აცხადებს, რომ ოპოზიცია რთულ ვითარებაშია და საბაბებს ეძებს, არ მიიღოს მონაწილეობა თვითმმართველობის არჩევნებში.

დეპუტატის თქმით, ოპოზიციის მიზანია ქვეყანაში ეკონომიკური დესტაბილიზაციის შექმნა.

ამასთან, დეპუტატი ამბობს, რომ ოპოზიციამ ამომრჩეველს იმედები გაუცრუა.

„ოპოზიცია რთულ ვითარებაშია. ისინი საბაბებს ეძებენ, თავიდან აიცილონ ამ არჩევნებში მონაწილეობა. ვინაიდან იციან, მათი რეიტინგი არის კიდევ უფრო მკვეთრად და დრამატულად შემცირებული, ვიდრე ეს იყო საპარლამენტო არჩევნების დროს, ვინაიდან გაუწბილეს იმედი თავიანთ ამომრჩეველს, არ მიიღეს საპარლამენტო მუშაობაში მონაწილეობა, ის რაღაც აბსურდული განცხადებები, თითქოს 400 000 ხმა გაყალბდა და 100 000 ადამიანი პირადობის გარეშე დავტოვეთ, 1 მტკიცებულება ვერ წარადგინეს და ამითიც, რა თქმა უნდა, გული დაწყვიტეს ამომრჩეველს და მიხვდნენ, ისინი მათ ტყუილში აცხოვრებენ.

ახლა ღიად აცხადებენ, რომ მათ მთავარ მიზანს წარმოადგენს ქვეყანაში ეკონომიკური დესტაბილიზაციის გამოწვევა. რა თქმა უნდა, თავიანთ ამომრჩევლებს კარგად ესმით, მტრულ ძალებთან აქვთ საქმე“,- აღნიშნავს ფრაქცია „ქართული ოცნების“ თავმჯდომარის მოადგილე.