“კარი გამოვაღე და ჩემ წინ ექვსი წლის უნახავი შვილი იდგა, ყველას გისურვებთ ასეთ ბედნიერ ახალ წელს” - ემიგრანტის წერილი

რედაქციაში წერილი შემოვიდა. იტალიაში, რომში მცხოვრები ქართველი ემიგრანტი, ქალბატონი ლალი ციხისელაშვილი გვთხოვდა მისი საახალწლო ისტორია და მილოცვა, დანარჩენი ემიგრანტების ყურამდე მიგვეტანა. ჩვენ, ქალბატონი ლალის წერილს, უცვლელად გთავაზობთ:

"ჩემო ემიგრანტებო, ჩემო ქართველებო, მინდა მოგილოცოთ შობა-ახალი წელიწადი და ყველას აშენებულ და დამშვენებულ საქართველოში ცხოვრება გისურვოთ. მჯერა და ღრმად მწამს, რომ ღმერთი არ გაგვწირავს და დაგვეხმარება დღესასწაულებს ჩვენ-ჩვენ ოჯახებში შევხვდეთ ხოლმე, ადრე თუ გვიან.

მე დღეს უბედნიერესი ქალი ვარ. ამ წერილის დაწერაც ალბათ ამიტომ გავბედე. ჩემმა ერთმა ცალმა სიხარულმა, ჩემმა გოგონამ ისეთი საახალწლო სიურპრიზი მომიწყო, ახლაც ვერ ვიჯერებ, რომ სიმართლეა. 

ჩემთვის ვიჯექი სამსახურში და იმას ვფიქრობდი, ხვალ რომ დასვენების დღეა, სად წავსულიყავი, როდესაც კარზე ზარი დარეკეს. კარი გამოვაღე და იმხელა ვიყვირე, ბებო მოსასულიერებელი გამიხდა. კარში ჩემი, 6 წლის უნახავი შვილი იდგა. ასე ადგა და ჩუმად ჩამომაკითხა. ცოცხალი თუ გადავრჩებოდი ბედნიერებისგან არ მეგონა.

სულ მეშინოდა, რომ ამბობდნენ ემიგრანტები, შვილებისგან უცხოობას ვგრძნობთო. მსგავსი არაფერია ჩვენს შორის, თითქოს გუშინ დავტოვე სახლში, ბებიასთან. ასეთი ბედნიერი ახალი წელი ჯერ არ მქონია. 

ჩემო ემიგრანტებო, ყველას გისურვებთ თქვენ შვილებთან და ოჯახთან ჩახუტებული შეხვედროდეთ ახალ წელს. კიდევ ერთხელ გილოცავთ."