საბერძნეთში ქართველს, „ოჯახის დამხმარე ქალს“ 8 წლით თავისუფლების აღკვეთა მიესაჯა, მას ბრალად მოხუცის ნარკოტიკული ნივთიერებით გაბრუება და ქურდობა ედება

საბერძნეთის, კერძოდ ლარისას  სისხლის სამართლის სააპელაციო სასამართლომ რვა წლითა და 6 თვით თავისუფლების აღკვეთა მიუსაჯა 63 წლის ქართველ ქალს, რომელმაც ბერძნული მედიის ინფორმაციით, ნარკოტიკული ნივთიერებით გააბრუა ხანდაზმული ქალი, რომელმაც ის ოჯახის დამხმარე დიასახლისად დაიქირავა. 

როგორც ბერძნული მედია იუწყება, ქართველი ქალი, 80 წლის მოხუცს, საუზმეზე  რძეში დამამშვიდებელ აბებს უყრიდა, რის შედეგადაც მოხუცი გონებას კარგავდა. 

გავრცელებული ინფორმაციით, 2021 წლის 20 აპრილს ქართველმა ქალმა 80 წლის ქალს პირველად 150 ევრო მოჰპარა, მოხუცმა ქალმა მომხდარი არ შეიმჩნია, თუმცა მოხუცის ჩვენების მიხედვით,  მეორე დღეს ქართველმა დამხმარემ ის კვლავ ნარკოტიკული ნივთიერებით გააბრუა, რის შემდეგაც ხელიდან 10.000  ევროს ღირებულების მაჯის საათი მოჰპარა და გაუჩინარდა. მომხდარის შესახებ  დაზარალებულმა ქალმა პოლიციაში განაცხადა.

საბერძნეთის პოლიციამ ქართველი ქალი, მაშინ დააკავა, როდესაც ის ტაქსით ათენის მიმართულებით გადაადგილდებოდა.

პოლიციამ ჩხრეკის შედეგად ქართველ ქალს ვერ აღმოუჩინა დაკარგული საათი, თუმცა მის საკუთრებაში ნაპოვნია ურეცეპტოდ შეძენილი ფსიქოტროპული აბები. მან პოლიციის წინაშე კატეგორიულად უარყო მის წინააღმდეგ წაყენებული ბრალდებები.

სასამართლო პროცესზეც ქართველმა ქალმა უარყო მის წინააღმდეგ წაყენებული ყველა ბრალდება. მან ასევე  უარი განაცხადა ადვოკატის რჩევაზე, დანაშაულის აღიარების შემთხვევაში სასჯელის შემსუბუქების შესახებ. 

საბერძნეთის სასამართლოს დადგენილებით, 63 წლის ქართველს, ყაჩაღობის, პასპორტის გაყალბების და ნარკოკანონმდებლობის დარღვევის ბრალდებით, 8 წლით და ექვსი თვით თავისუფლების აღკვეთა მიესაჯა. 

ასევე საინტერესოა

🔵საბერძნეთში შესვლის მსურველებს სპეციალური (PLF) ფორმის შევსება აღარ მოუწევთ (exclusivetv.ge)

🔵საბერძნეთში მომხდარი სასტიკი მკვლელობის მთავარი ეჭვმიტანილი 57 წლის კაცია, რომლისგანაც წყვილი ბინას ქირაობდა

🔵"ჩემო პატარა ბიჭო"- ტრაგიკული სურათის მძიმე ისტორია