„ბადანტემ“ იმ მოხუცზე “იქორწინა”, რომელსაც უვლიდა და ქონება უკანონოდ მიითვისა

ტარანტოელი მოხუცი, რომელსაც მეხსიერების პრობლემები აქვს, საკუთარი მომვლელისა და მისი მეგობარი მამაკაცის თაღლითობის მსხვერპლი გახდა.

გამოძიების თანახმად, ქალმა მარტოხელა მოხუცი ქვრივის ნდობით და ჯანმრთელობის მდგომარეობით ისარგებლა და უკანონოდ მიითვისა სახლი, მანქანა და დაახლოებით 200 000 ევრო.

„ბადანტეც“ და მისი მეგობარი მამაკაციც პოლიციამ უკვე დააკავა და მათ აღკვეთის ღონისძიების სახით, შინაპატიმრობა აქვთ შეფარდებული. მოსამართლის მიერ გაიცა ბრძანებულება, რომლის თანახმადაც წყვილს სასწრაფო წესით უნდა ჩამოერთვას 200 000 ევრო.

გამოძიებას მსვლელობა მას შემდეგ მიეცა, რაც პოლიციაში საჩივარი დაზარალებულის ძმისშვილმა შეიტანა. ქალმა მოხუცს ნელ-ნელა ყველა ნათესავი ჩამოაცილა, ძმისშვილს კი სახლში სტუმრად მისვლაც კი აუკრძალა და ბიძას მისი ტელეფონის ნომერი დაუბლოკა.

მიუხედავად იმისა, რომ „ბადანტეს“ ჰყავდა მეგობარი მამაკაცი, იგი 2020 წლიდან ოფიციალურ ქორწინებაში, სწორედ საკუთარ დამსაქმებელთან ფიქსირდებოდა.

როგორც მოგვიანებით გაირკვა, მოხუცმა ამის შესახებ არაფერი იცოდა. ასევე არაფერი იცოდა იმის შესახებ, რომ სახლი რომელშიც ცხოვრობდა, საკუთარი მომვლელისთვის, ხოლო მანქანა მისი შვილისთვის ჰქონდა „ნაჩუქარი“. ასევე ხელი ჰქონდა მოწერილი მეორე მანქანის ყიდვის შესახებ, რომლის ღირებულებაც 56 000 ევრო გახლდათ. ქალი ყოველთვე რეგულარულად იღებდა მოხუცის პენსიას, 2000 ევროს ოდენობით.

აგრეთვე მომვლელს ხელი მიუწვდებოდა საბანკო ანგარიშებზეც, საიდანაც საერთო ჯამში 94 000 ევრო გამოიტანა. ასევე საბანკო ბარათის საშუალებით გადახდილი იყო საკომისიოები, ჯამში 81 000 ევრო.

ახლა „ ბადანტესა“ და მის მეგობარ მამაკაცს, ჩადენილის გამო, კანონის წინაშე პასუხისგება მოუწევთ.

წყარო: Repubblica.it

ასევე დაგაინტერესებთ:

🔵 იტალიური ენის უფასო კურსები ემიგრანტებისთვის - ქალაქების მიხედვით

🔵  ქართველი მარიამი და იტალიელი ჯორჯა - გოგონა მინიშნებების სამყაროდან

🔵 როგორ დავუკავშირდეთ, ქალაქ ბარიში არსებულ, საქართველოს გენერალურ საკონსულოს