ქართველი მარიამი და იტალიელი ჯორჯა - გოგონა მინიშნებების სამყაროდან

იტალიაში პატარა ქალაქის, ერთ პატარა ქუჩაზე დავსახლდით. ადგილობრივი სოციუმისთვის - შეუმჩნეველი, ხოლო დამხვდური თანამემამულეთათვის ახალი უცნობები. ემიგრაციის გამომწვევ მიზეზებზე საუბარს, მას შემდეგ შევეშვი, როცა სიტყვა - „ნუ, ეგრეც არ იქნებოდა", - მოვისმინე. იმ წუთიდან მივხვდი, რომ აქაც ჩემი თავი უნდა შემექმნა, მაგრამ საზოგადოების ორი განსხვავებული სეგმენტისთვის, იტალიელებისა და ევროპაში მცხოვრები ქართველებისთვის.

ემიგრაცია, არა რიგი და ყველაზე აქტუალური საკითხების, არამედ მორალის და ღირსების განცდის ქონის გამო გადავწყვიტეთ. კონკრეტული შემთხვევის, კონკრეტულ მიზეზთა გამო, თუმცა არჩევანით გამოწვეული დანაკარგი, მეტია შეძენილ გამოცდილებაზე!!!

გადავწყვიტეთ და იტალიის „ქუსლში“ აქილევსივით დავიდეთ ბინა. სუსტი წერტილების გამო, ცხოვრება ხშირად გვამარცხებდა, მაგრამ აქაურმა ზღვისპირა და მარილიანმა კლიმატმა, ყველა ჭრილობები ნელ-ნელა მარმარილოსავით გადააქცია.

პატარა ქალაქის, პატარა ანტიკურ ქუჩას, სადაც ვცხოვრობდით, Pierto Di Giorgo- ს სახელი ჰქონდა მინიჭებული. ცხოვრება ამ პატარა ქუჩიდან დავიწყეთ და როცა მარიამი სკოლის მოსწავლე გახდა და ჩვენ არ შეგვეძლო მას სასწავლო პროცესში დავხმარებოდით, მოხდა ისე, რომ დამხმარე მასწავლებელი სახელად, Giorgia ვიპოვეთ. ახლაც მახსოვს ქუჩისა და მასწავლებლის სახელებთან დაკავშირებული პარალელით მიღებული, რაღაც მშობლიურის განცდა - GEORGIA, რომელსაც მინიშნებების ანგელოზს ვეძახდი.

GIORGA LAERA - მარიამის დამხმარე მასწავლებელი, ჯორჯა მარიამის მეგობარი და გოგონა, რომელმაც მარიამის ცნობიერი სამყარო იტალიურ ენაზე გაუღო. ჯორჯამ ასწავლა ანბანი, ასწავლა კითხვა, ასწავლა წესები, ასწავლა ბრძოლა, გარემოს სიყვარული და ყველაზე მთავარი - მან, მარიამს, მის ქვეყანაში სწორ გზაზე სიარული ასწავლა.

ჯორჯა და მარიამი სკოლაში ერთად მიდიან, ერთად ბრუნდებიან და ერთად სწავლობენ იტალიურს, ინგლისურს, მათემატიკას, ისტორიას, გეოგრაფიას, სამოქალაქო განათლებას, მუსიკას, მეცნიერებას და დამკვიდრებას იქ, სადაც ნაკლებად გელოდებოდნენ.

პ.ს. ეს ფოტო სამსახურში მიმავალმა გადავუღე. ვხედავ, კაფე-ბარის წინ სხედან და მარიამი დილის საუზმეს მიირთმევს... და მე მშვიდად გავაგრძელე გზა, სრულიად მშვიდად, რადგან ის ჯორჯასთან ერთად იყო!
გოგონა მინიშნებების სამყაროდან Giorgia Laera მე შენ მიყვარხარ!

ავტორი: ხათუნა შარაძე

მსგავსი თემები:

⭕ ქართველი ემიგრანტი იტალიაში, სიმსივნით დაავადებული ქალების დონორი გახდა

⭕ იტალიური წარმატება ქართულად - „უკვე მოვაწერე ხელი კონტრაქტს და ორი წლით „გავიყიდე“ (ექსკლუზივი)

⭕ იტალიიდან საქართველოში დაბრუნებული ემიგრანტის ისტორია

⭕ მე მიშას დროს ვარ წამოსული და ვიზაში 4500 ევრო მაქვს გადახდილი და მეცაო, მაგრამაო კმაყოფილი ვარ ჩემი ქვეყნის ჯიბეში რომ წავიდა ეს ფულიო

⭕ "მინდა გაგიზიაროთ ჩემი ემიგრანტული სიხარული"