როგორ უნდა მოვიქცეთ კოვიდინფიცირებულთან კონტაქტის ან სიმპტომების გამოვლენის შემთხვევაში - ახალი რეგულაციები

2022 წლის იანვრიდან იტალიაში კარანტინთან დაკავშირებით, ახალი რეგულაციები ამოქმედდა. ქვეყნის პარალიზების თავიდან ასაცილებლად, ქვეყნის მთავრობამ შემსუბუქებული საკარანტინე სისტემა შეიმუშავა.

როგორ უნდა მოიქცეთ იმ შემთხვევაში, თუ კოვიდ19-ისთვის დამახასიათებელი სიმპტომები გამოგივლინდათ?

პირველი რაც უნდა გააკეთოთ, არის ის, რომ დაუკავშირდეთ ოჯახის ექიმს. თუ ექიმი საჭიროდ ჩათვლის, უნდა გაიკეთოთ კოვიდტესტი:

• ტესტი შესაძლოა, თავად ექიმმა აგიღოთ.
• ექიმმა დაგიჯავშნოთ ვიზიტი რომელიმე ლაბორატორიაში.
• ექიმმა მეილზე, ან ტელეფონის ნომერზე გამოგიგზავნოთ მიმართვა, რომლის საშუალებითაც შეძლებთ ტესტის გაკეთებას.

პასუხი ტელეფონზე მესიჯის სახით მოგივათ.

თუ დადგინდა რომ კოვიდდადებითი ხართ...

• დადებითი პასუხის შემთხვევაში, ტესტის პასუხთან ერთად, სამედიცინო უწყება გამოგიგზავნით ბმულს, რომელზეც უნდა შეიყვანოთ ყველა იმ ადამიანის მონაცემი, რომლებთანაც ბოლო 48 საათის განმავლობაში მჭიდრო კონტაქტი გქონდათ.
• იქვე გამოგიგზავნიან კარანტინის წესებს: ა. თუ აცრილი ხართ ბუსტერით, ან დაასრულეთ ვაქცინაციის პირველი ციკლი, ან გადაიტანეთ ვირუსი ბოლო 120 დღის განმავლობაში, კარანტინის ვადა მოიცავს ტესტის გაკეთების დღიდან 7 დღეს, აქედან ბოლო 3 დღე სრულიად უსიმპტომო უნდა იყოს. ბ. ყველა დანარჩენ შემთხვევაში, კარანტინის ვადა მოიცავს ტესტის გაკეთების დღიდან 10 დღეს, აქედან ბოლო 3 დღე სრულიად უსიმპტომო უნდა იყოთ.

თუ ვირუსით დაინფიცირებული პირის "კონტაქტებში აღმოჩნდით":

• თუ აცრილი ხართ ბუსტერით, ან დაასრულეთ ვაქცინაციის პირველი ციკლი, ან გადაიტანეთ ვირუსი ბოლო 120 დღის განმავლობაში, უნდა აწარმოოთ თვითდაკვირვება 5 დღის განმავლობაში, გამოგივლინდებათ თუ არა რაიმე სიმპტომი. ვალდებული ხართ 10 დღის განმავლობაში ატაროთ FFP2 ტიპის ნიღაბი. სიმპტომების არქონის შემთხვევაში, არ გადადიხართ კარანტინში და არ წყვეტთ მუშაობას.
• თუ 120 დღეზე მეტია, რაც დაასრულეთ ვაქცინაციის პირველი ციკლი, ან გადაიტანეთ ვირუსი, უნდა გაიაროთ 5 დღიანი კარანტინი და კარანტინს ასრულებთ თუ ტესტმა მეხუთე დღეს უარყოფითი პასუხი გიჩვენათ. თუ ტესტს არ გაიკეთებთ, ამ შემთხვევაში უნდა გაიაროთ 14 დღიანი კარანტინი. სამსახურში დაბრუნებას მხოლოდ ტესტის უარყოფითი პასუხის შემთხვევაში შეძლებთ.
• თუ არ ხართ აცრილი, ან გავლილი გაქვთ ვაქცინაციის არასრული პირველი ციკლი, ან დაასრულეთ ვაქცინაციის პირველი ციკლი, მაგრამ ჯერ არ გასულა 14 დღე, ამ შემთხვევაში, უნდა გაიაროთ 10 დღიანი კარანტინი და კარანტინს ასრულებთ თუ ტესტმა მეათე დღეს უარყოფითი პასუხი გიჩვენათ. თუ ტესტს არ გაიკეთებთ, ამ შემთხვევაში უნდა გაიაროთ 14 დღიანი კარანტინი. სამსახურში დაბრუნებას მხოლოდ ტესტის უარყოფითი პასუხის შემთხვევაში შეძლებთ.

შეგახსენებთ, რომ იმ შემთხვევებში, სადაც ვალდებული ხართ გაიაროთ კარანტინი, კარანტინის ბოლოს აუცილებელია ტესტის გაკეთება, რომლის მიმართვასაც ოჯახის ექიმი დაგიწერთ, ან თავად დაგიჯავშნით ვიზიტს. ასევე ტესტირების გავლა შესაძლებელია სამედიცინო უწყების მიერ თქვენთვის გამოგზავნილი განკარგულების საფუძველზე, რომელიც კარანტინის პირობებს განსაზღვრავდა.

ტესტის პასუხის მიხედვით, კარანტინის დასრულების ვადის შესახებ ინფორმაცია მოგივათ ტელეფონზე მესიჯის სახით.

ნინა მამუკაძე

იტალია, ფლორენცია

წყარო