როგორია „ბადანტის“ სამუშაო გრაფიკი და რა ხდება მისი დარღვევის შემთხვევაში?!

ნებისმიერი ტიპის სამუშაოს, აქვს თავისი გაწერილი გრაფიკი, რომლის დაცვაც როგორც დამსაქმებლის, ასევე დასაქმებული პირის ვალდებულებაა. იტალიური კანონმდებლობით, ეს საკითხი მკაცრად არის გაწერილი და დარღვევის შემთხვევაში სანქციებია გათვალისწინებული.

თუ ოჯახში ხართ დასაქმებული, უნდა იცოდეთ, რომ კონტრაქტის მიხედვით, არსებობს დროის გარკვეული ლიმიტი, რომლის გადაჭარბების შემთხვევაში, უფლება გაქვთ, პრეტენზია გამოთქვათ და კანონი თქვენს მხარეს იქნება.

თუ პირი მუშაობს როგორც „ბადანტე“ და ცხოვრობს სამუშაო ადგილზე, სრულებით არ ნიშნავს იმას, რომ ვალდებულია 24 საათის განმავლობაში თავისი დამსაქმებლის განკარგულებაში იყოს. მისი სამუშაო დღე შეადგენს მაქსიმუმ 10 საათს, ორსაათიანი შესვენებით. შესაბამისად, კონტრაქტი განისაზღვრება 54 საათით კვირაში, დასვენების დღეების გამოკლებით.

რა ხდება იმ შემთხვევაში, თუ დამსაქმებელი ამ კანონს არღვევს?

თუ დამსაქმებელი კონტრაქტით გათვალისწინებულ, ან კანონით განსაზღვრულ სამუშაო გრაფიკის მაქსიმუმს არ იცავს და „ბადანტე“ ამის დამტკიცებას შეძლებს, დამსაქმებელი დაჯარიმდება 200-დან 1500 ევრომდე.

იმ შემთხვევაში კი, თუ დამსაქმებელი „ბადანტეს“,  შესვენების საათების გამოყენების საშუალებას არ აძლევს, ჯარიმა 100-დან 300 ევრომდე მერყეობს. 

ნინა მამუკაძე